No kan frivillige lag og organisasjonar søkja om straumstøtte

Tidlegare var det kommunane som forvalta straumstøtteordninga, men no er det Lotteri- og stiftelsestilsynet som tek hand om ordninga, som gjeld fram til mars 2023.

Føremålet er å motverke negative konsekvensar av dei høge straumprisane.

Perioden ein no kan søkja støtte til gjeld for april-juni 2022. Det er lagt opp til ein søknadsrunde per kvartal.

– Straumstøtteordninga gjeld for organisasjonar med straumforbruk med ein månadleg snittpris på over 70 øre per kWt i søknadsperioden. Mottakarar får dekka 80 prosent av prisskilnaden mellom 70 øre per kWt og den månadlege snittprisen, seier Marianne Skjeldestad Hove, avdelingsdirektør for frivilligheitsstønad, i ei pressemelding.

Kriteriar for å søkje

For å kunna søkja på straumstøtteordninga må ein ha organisasjonsnummer. Ein kan ha rett på støtte om verksemda er registrert i Frivilligregisteret, eller om verksemda i hovudsak blir drive med frivillig arbeidsinnsats.

Førebels ligg det fleire søknadar om straumstøtte på listene til Lotteri- og stiftelsestilsynet.

Her kan ein mellom anna sjå at Husnes Indremisjon har søkt om 3567 kroner. Denne summen er basert på eit forbruk på 1679 kWt i april, 2096 kWt i mai og 893 kWt i juni.