No har han hat trick på Grendabørsen

Ingen spelte seg til fleire G-ar i Kvinnherad-fotballen denne sesongen enn midtbaneeleganten Kjetil Eide.

Med eit nedrykk, eit lag som trekte seg og eit som ikkje sikra plassen i 6. divisjon før siste serierunde, kan ikkje sesongen 2019 kallast for anna enn grå i Kvinnherad-fotballen. Så kan ein jo seia at fargen grå har gått litt igjen i kommunen sin seniorfotball dei siste sesongane, det har også namnet på årets spelar.

For som i 2017 og 2018 er det også i år Kjetil Eide som har fått flest G-ar, med så mange som 27. Ni av dei fekk han for prestasjonane i Trio-drakt i vår, medan han plukka dobbelt så mange etter returen til «Nya Myro» i blått og gult.

– Det har vore ein spesiell sesong, litt løyen i grunn. Eg har ikkje hatt så mykje fotballglede, og har jobba to-skift på Kværner som igjen har ført til at eg berre har kunna trena annankvar veke. Så sjølv om det blei 27 G-ar, så føler eg at eg har meir inne, seier stillasarbeidaren.

 

Idiotisk

Etter overgangen til Halsnøy kom fotballgleda sigande litt etter litt. Og no er han klar til å gå på ein sesong der han skal gjera alt for å få Halsnøy opp i 5. divisjon.

– Her på Halsnøy så speler eg jo med kameratane mine, og eg har det kjekt når eg speler saman med dei. Så er det jo heilt klart at det er eit heilt anna nivå i 6. divisjon enn 4. divisjon, så at eg har plukka fleire G-ar etter eg gjekk til Halsnøy er berre naturleg, seier han.

På spørsmål om kva han synest om å bli kåra til årets spelar i Grendabørsen for tredje året på rad, er han klar i talen.

– Det er sjølvsagt veldig stas, men det er ikkje det eg tenker på no. Eg tenker meir på dei som har planar om å leggja ned skulen her på Halsnøy. Det synest eg er idiotisk, seier han.

Kjetil er også å finna på ein delt tredjeplass på årets toppscorarliste med sine ti mål. Det er tre færre enn Rosendal-spiss Ingeborg S. Ljostveit plukka med seg. Ho banka inn 13 ballar i løpet av 2019-sesongen, og kan med det smykka seg med tittelen årets toppscorar i Kvinnherad.