No har bubilfolket bestemt; Røyrane Bobilparkering er «Norges Beste Bobilplass 2023»

– Me har visst det i nokre veker, men no kan me altså offentleggjera det, seier Ingemar Røyrane, som eig Røyrane Bobilparkering AS saman med borna sine Jon Andre, Tor Rune, Ørjan og Maria.

Laurdag var det ei markering i naustet, som er nytta som samlingslokale på plassen. Her vart det feira med kake, lappar, is, varm, kald og sprudlande drikke.

Ingen av borna til Ingemar hadde moglegheit til å komma, men naustet var likevel fylt opp med slekt, naboar og vener som ynskte å feira saman med dei.

Sjølv om det er Ingemar og borna som eig staden, er sambuar Trine Myrvold, og Svein og Vigdis som leiger «gamlahuset» på garden, gode bidragsytarar, og sjølvsagt er dei med og feirar.

Kan vinna nasjonal kåring: – Veldig stolte

Det vart talar og mimring om kjekke besøk.

– Til dags dato har me aldri hatt trøblete gjester, som har laga til bråk, skryt Trine.

Før temaet går over på artige episodar om bilar som har parkert oppe på treterrassen som er meint som uteplass og campingutstyr. Og vidare på dei mange unike bubilane som har vore innom, alt frå mindre bilar med overnatting på taket, til endå meir spesielle.

– Det har vore mange artige «bubilar» innom. Ein gong kom det ein Tysk bil med ei brakke på hengaren, flirer Ingemar.

Dei har fått seg ein del stamgjester, mellom anna gjengen frå Valen, som startar og avsluttar bubilsesongen sin på Røyrane. Nokre av dei prata Grenda med i 2021. Det har òg blitt arrangert fleire bubiltreff.

Fullt i helgane vår og haust

Dei 20 plassane deira er som regel fulle i helgane frå ein opnar rundt påske, til dei stenger av for vinteren. Men det er god plass i midtvekene og midt på sommaren.

– Det er lett å få plass her midt i vekene om våren og haust. Det same gjeld midt på sommaren, men i helgane vert det som regel fullt, forklarar Trine.

På spørsmålet om kvifor dei trur dei klatra til topps i kåringa, viser dei til tilbakemeldingane frå gjestane. Det at dei kjem nedom og slår av ein prat, spør korleis besøket har det og om det er noko dei kan hjelpe med, er nok ein stor grunn.

– Me får mange fine tilbakemeldingar frå gjestene våre. Dei skryt av plassen, tilboda, naturen og roen her, også set dei pris på at me kjem nedom og slår av ein prat, om me er heime sjølvsagt. Eg og Trine stortrivest med den kontakten me har fått med gjestene våre, og me føler me får eit godt og nært forhold til dei, forklarar Ingemar og legg til:

– Bubilfolket er ofte sosiale som liker å bli kjend med nye folk. Men det er òg dei som set pris på roen som finst hos oss, og synest det er kjekt å vera for seg sjølve. Me føler begge typar får det her hos oss på Røyrane.

Starten

Ideen om Røyrane bobilparkering vart sådd i 2018. Då hadde dei fleire gongar opplevd at bubilturistar frå inn- og utland, som var på veg forbi, stoppa og spurde om dei kunne få parkera nede ved vatnet. Og sidan dei har bubil sjølve sat dei med ein del kunnskap om kva ynskjer og behov slike gjester har.

– Tanken om å skapa noko som neste generasjon kan utvikla og ha som ei kjærkomen attåtinntekt til garden, var god òg med det vart plassen til. Bygd opp med svært mykje eigeninnsats av familien, med utforming og oppbygging. Det er sjølvsagt brukt fagfolk der det er kravd, forklarar Ingemar.

Dei byrja i det små sommaren 2019, utvida litt i 2020 og har hatt full sesong med godt belegg i 2021, med kring 20 plassar. Besøkstala har auka kvart år, med nesten ei dobling frå 2022 til 2023.

Dei fyrste åra kunne ein berre tilby utedo med tømming av svartvann i tank ved sida av, men i august 2022 var sanitærbygg med tømmestasjon klart.

Laga bubilparkering i Ølve

– Då sanitæranlegget var ferdig kom ein gjest til oss og sa «De må ikkje stenge utedoen sjølv om de har fått nytt anlegg, det jo verdas finaste utedo», så den er med i drifta vidare, ler han.

Det skal seiast at utedoen ligg i motsett ende i forhold til sanitæranlegget, og er difor raskare å kome til for dei som står i den enden og for dei som oppheld seg i naustet.

Røyrane

Bubilparkeringa ligg elles idyllisk til heilt i vasskanten ved Kvitebergsvatnet, mellom Hatlestrand og Ølve. Forfedrane har budd der sidan 1600-talet, og garden er rik på historie om aktiviteten som har vore drive i området der. På gardssaga frå 1880, som er nyrestaurert, finn gjestene tak over hovudet ved den intakte sagbenken. Det gamle naustet som markeringa denne dagen vart halde i, er også sett i stand.

Her kan ein samla seg rundt langbordet, om ein vil. Ved elva som renn gjennom bubilplassen ligg det gamle kvernhuset på garden. Her er òg ein liten kraftstasjon som nyleg vart restaurert og gjort tilgjengeleg for turistane.

Skogsvegen opp frå Røyrane fører til mange ulike turmål. I området rundt er det vegar og stiar som høver for både turgåing og sykkelturar. Bubilplassen har eigen liten minigolf- og hesteskokastingsbane. Gjestane har tilgang til fiske, båt- og badeliv der ein kan leiga seg båtar, kajakkar og det er fiskegarn til låns. I 2023 vart det montert vasstrampoline.

Ringverknadar

Tilboda på bubilplassen er ikkje berre mynta på dei tilreisande gjestene, dei står også til disposisjon for folk på bygdene. Fleire familiar har kome hit for å feira barnebursdag, skuleklassar har hatt utedag her, andre har kome for å spela minigolf og arbeidsplassar har hatt samankomer her.

– Me ynskjer at bubilplassen på Røyrane kan vera med på å skapa positiv blest om området Ølve/Hatlestrand. Dei som er gjester hos oss, vil handla på butikkane her, bruka bensinstasjonane og så vidare, og med det vera med på å styrkja næringsgrunnlaget for fleire. Har bubilturistane gode opplevingar her, aukar sjansen for at dei fortel om bygdene våre til andre og ved å skapa eit tilbod som også bygdefolk kan ha glede av, er me forhåpentlegvis med på å gjera området vårt meir attraktivt for fastbuande, meiner dei.

«Din fritid» kjem på besøk seinare i vår for å overrekkja det synlege beviset på den gjeve kåringa.