No er vonleg flaumproblemet løyst

Flaum og vassinntrenging hjå bensinstasjonen og bilverkstaden i Dimmelsvik har vore ein gjengangar i avisspaltene i fleire år. Men no er det vonleg slutt på problemet.

 

– Vi har lagt nye røyr, heilt frå overkanten av vår eigedom og ned til sjøen.

Det fortel Bernt Bjørsvik, dagleg leiar og eigar av 49% av aksjane i Dimmelsvik Bil (resten eig Jæger Automobil AS).

Arbeidet vart utført ved inngangen til sommaren, og avslutta med at det vart lagt ny asfalt for om lag éin månad sidan.

– Mesta har ansvaret for å få vatnet over vegen, så den biten har dei stått for, inkludert å inngå avtale med entreprenør. Men vi har gjort meir også lengre oppe, for no ville vi vera heilt sikre på at det vert i orden, seier Bjørsvik.

 

Kollaps

Arbeidet avslørte med all tydelegheit kva som har vore hovudårsaka til dei hyppige overfløymingane.

– Det viste seg å vera ein fullstendig kollaps under vegen. «Kista» under vegen var heilt rasa saman, og heilt tett. No har vi lagt store, 80 centimeter vide røyr på heile strekninga. Vi har såleis overdimensjonert i forhold til det fagfolk seier er nødvendig. Viss det ikkje hjelper no, så veit eg ikkje kva vi skal gjera, smiler Bernt Bjørsvik.

Han legg til at det er utført kamerainspeksjon i alle røyr, og då vart det stadfesta at tilhøva under bakken ser bra ut.

– Så alt som kunne utbetrast, er no utbetra. Det har blitt gjort ein betydeleg jobb for å få løyst problemet, understrekar den daglege leiaren.

 

Ros til brannvernet

– Korleis har det vore for dykk med desse overfløymingane?

– Det har heilt klart vore ei stor belastning for oss. Spesielt for kundane på bensinstasjonen, for det er der vatnet har vore mest til plage. Det har ikkje alltid vore lett å førebu seg heller, for vi har ikkje kunna sitja oppe heile natta og venta på det kvar gong det var meldt mykje regn, seier Bjørsvik.

Han vil elles takka Kvinnherad Brannvern, som har vore «suverene» med å låna ut vassgater for å sperra vatnet ute.