No er Vegard ordførar

Det kom eit klårt og tydeleg «Ja» frå Vegard Bjørnevik då Hilde Enstad hadde sitt siste namneopprop som ordførar. Bjørnevik var førstemann til å bli ropt opp, og skulle snart få æra av å erstatta Enstad ved ordførarbordet.

Det næraste ein kom drama i forkant av møtet, var ei avklaring omkring opposisjonen ville få høve til å stemma blankt når det kom til ordførarvoteringa.

– Me ynskjer ikkje å stemma på ein Høgre-ordførar, men har ikkje nokon motkandidat å stemma på heller, sa Silje Nordtveit OIsen til Grenda før møtet vart sett.

Det var to forfall til det konstituerande møtet. Åge Aakre (INP) og Stein Olav Ølvestveit (Sp) var ikkje til stades, der høvesvis Kjell Aage Ekeland og Jarle Andresen møtte som vararepresentantar i deira stad.

– No ser eg fram til å bli gardbrukar på heiltid, sa Hilde Enstad då ho talte kommunestyret for siste gong som ordførar.

– De er valde fram fordi innbyggjarane i Kvinnherad meiner de er gode ombodsfolk for dei, minna ho det nye kommunestyret om.

Ho takka også alle tilsette i Kvinnheradkommune for jobben dei gjer, og ho sendte ei helsing til alle dei ho har møtt i sine år som ordførar.

Vegard Bjørnevik vart valt med 23 av 35 stemmer. Thea Vaage vart stemt fram som varaordførar med 22 stemmer.