No er naudhjelpa på veg

Fyrst og fremst var det ein gedigen haug med sekker fulle av klede som dugnadsgjengen måtte lempa inn i traileren. Men det var òg ein del matvarer og hygieneartiklar som låg klart i lageret i Uskedalen. Eldsjel Tormod Myklebust rekna likevel ikkje med at bilen ville bli heilt fullstappa.

– Nei, den vert nok ikkje det, men så hadde vi jo òg ei sending tidleg i mars, og då fylte vi faktisk ein halv bil, fortalde han.

Myklebust er såleis strålande nøgd med kvinnheringane sin gjevarvilje.

– Det har vore heilt eineståande, smilte han.

Myklebust nytta høvet til å takka Kvinnherad vekstbedrift for at dei stilte gratis lager til disposisjon, Eurosko på Husnes for at dei donerte fleire kartongar med gode sko, og Spar Uskedalen som gav store rabattar til dei som handla varer der for å gje til dei trengande i Ukraina.

– Mellom anna var det nokon som gjekk saman og kjøpte ein heil palle med bleier. Det vart òg kjøpt inn morsmjølkerstatning, opplyste Tormod Myklebust.

Ingen skal føla seg trygge

Traileren køyrde ned til Haugesund tysdag kveld. Torsdag kveld startar ferda i retning det krigsråka Ukraina. Tormod Myklebust skal vera sjåfør saman med ein kollega frå Skånevik.

– Vi skal køyra til grenseområdet mellom Polen og Ukraina. På måndag kjem det ein trailer frå Ukraina og hentar varene, fortalde Myklebust, som har vitja Ukraina med hjelpesendingar over 20 gonger tidlegare.

– Er situasjonen ekstra spent denne gongen?

– Ja, den er jo det. Det verkar som at russarane har starta ein ny storoffensiv. Ingen skal føla seg trygge, det er nok det som er bodskapen. Det er heilt frykteleg.

Vidar Akselsen er sjef for den Haugesund-baserte THK-stiftelsen, organisasjonen som er ansvarleg for hjelpesendingane frå Kvinnherad.

– Denne sendinga skal inn til Korosten. Det er faktisk det fyrste lasset vi får så langt inn i landet etter at krigen starta, sa han.

Også Akselsen kunne fortelja om ein enorm respons, frå heile Norge. Mellom anna har Lerum gjeve 11.200 flasker med syltetøy. I tillegg har han ei liste med kring 100 sjåførar som har stilt seg til rådvelde.

– Saman med KPK-stiftinga (på Jæren) har vi sendt opp mot 40 trailerar nedover etter at krigen starta den 24. februar, konstaterte han nøgd.

Sanningsvitne

– Kva veit du om tilhøva i Korosten akkurat no?

– Korosten ligg 15 mil vest for Kyiv. Situasjonen der er relativt roleg, for russarane gjekk ikkje gjennom byen. Men nokre bygningar er bomba sønder og saman. I starten av krigen måtte innbyggjarane springa i bomberomma 15-20 gonger i døgeret. Eg har sett bilete av bomberomma, og det er eigentleg ikkje anna enn jordkjellarar, opplyste Vidar Akselsen.

Men han fryktar ei endå større humanitær krise til hausten og vinteren, og viser til at det internt i Ukraina finst om lag 10 millionar flyktningar. Han slår difor fast at det vert behov for naudhjelp i lang tid framover.

– Til hausten har THK-stiftelsen drive på i 27 år. Dei friviljuge sjåførane er våre sanningsvitne, for dei har sett at hjelpa kjem fram og at behovet er stort, understreka Akselsen.