– No er me like moderne som både Edda og Bergen

Ein splitter ny, topp moderne laserprosjektor er no installert, og Husnes kino er godt nøgde med resultatet.

– Den gamle prosjektoren var overmoden for utskifting. Den har stått der sidan 2010 og var rett og slett gamal og sliten. Me har hatt ein del problem med han den siste tida, men det som var litt komisk oppi det heile var at to dagar før den nye skulle bli installert fekk me nokre stygge striper på han. Hovudeininga haldt på å ryka, så det var på høg tid, fortalde driftsmedarbeidar Oddvar Onarheim.

Bikka millionen

– Me er litt stolte av oss sjølve. Det er blitt gjort ein god jobb med å få han på plass, og ikkje minst med å få han oppe og gå. Det er ei svær datamaskin det er snakk om, ein svær kasse, la han til.

Onarheim fortel vidare at oppgraderinga er både stor og kostbar.

– Akkurat sluttsummen på det heile har eg ikkje i hovudet, men me bikka millionen i alle fall. Dei siste åra har me gjort mykje. For om lag eitt års tid sidan oppgraderte me lyden med eit nytt sourroundanlegg, som også då var modent for utskifting. Det var også ein tung kostnad, men slike ting må ein ta over tid, forklarte Onarheim.

– Eg tykkjer at me har fått mykje for pengane. No er alt meir moderne, i form av både kvalitet, kvassare bilete, flimring og støy. No er me like moderne som både Edda i Haugesund og Bergen kino, fortsette han.

Onarheim er likevel sikker på at den gjennomsnittlege kinogjengaren ikkje kjem til å merka noko stor skilnad på neste filmframsyning.

– Den vanlege mannen i gata som kjem og ser på vil nok ikkje tenka «wow», men me som balar på med dette ser stor skilnad. Og dersom me hadde kunna sett dei opp ved sidan av kvarandre hadde skilnaden vore tydeleg, understreka han.

Frå 2K til 4K

For dei som er drivne i den tekniske verda så forklarte Onarheim oppgraderinga slik:

– Den gamle hadde ei 2K oppløysing med femti hertz. Han brukte også ei spesiell halogenpære som hadde ei levetid på 1000 timar, som i tillegg kosta 6500 kroner å byta kvar gong. Den nye prosjektoren har 4K oppløysing med hundre hertz som bruker laser i staden for pæra. I tillegg kan me no overvaka heile systemet via datamaskin, i staden for gjennom ein pitte liten skjerm slik som den gamle hadde.

Det nye vedunderet er allereie teken i bruk og Onarheim håpar at folk kjem til å setja pris det forbetra tilbodet.

– Me jobbar ganske heftig for å få siste stikk i filmar, samtidig som me er nøydde til å halda eit breitt spekter då det er mange som ynskjer andre filmar enn berre det som er hipt. Med tanke på at me berre har har éin sal, så er jo kapasiteten begrensa, noko som gjer at me ikkje kan syna filmane lika lenge som dei med fleire salar. Men me håpar at folk set pris på dette og vil nytta tilbodet, avslutta han.