No er kraftleidningen sendt på høyring – her er traseane

Noregs vassdrags- og energidirektorat (NVE) har motteke tre meldingar frå Statnett SF for ny 420 kV kraftleidning frå Sauda via Blåfalli, Rosendal, Mauranger og Samnanger til Øygarden. Meldingane gjev ei overordna beskriving av Statnett sine planar, og forslag til kva konsekvensutgreiingar dei meiner må gjennomførast før det kan søkjast om konsesjon.

Den eine meldinga gjeld strekninga Sauda–Blåfalli. Tiltaket inneber ein ny om lag 37 km lang 420 kV kraftleidning og ny transformatorstasjon i Blåfalli.

«Eksisterande 300 kV leidning på same strekning, som er gammal og har låg overføringskapasitet, vil bli rive når den nye leidningen blir sett i drift», skriv NVE i høyringsbrevet.

Mekanisk styrke

Melding nummer 2 omfattar Blåfalli–Mauranger–Samnanger.

«Tiltaket inneber ein ny om lag 90 km lang 420 kV kraftleidning frå Blåfalli via Mauranger til Kvamskogen sør for Samnanger og ny transformatorstasjon i Mauranger. I tillegg kan det bli behov for nye stasjonar ved Ænes eller Fureberg sørvest for Mauranger. Eksisterande 300 kV leidning på strekninga Blåfalli–Mauranger–Kvamskogen, som er gammal og har låg overføringskapasitet, vil bli rive når den nye leidningen blir sett i drift. Det same gjeld Statnett sitt anlegg i dagens Mauranger transformatorstasjon», opplyser NVE.

Eksisterande leidning på den 43 kilometer lange strekninga Blåfalli-Mauranger er frå 1968.

«Dagens leidningar egnar seg ikkje for ombygging til 420 kV grunna alder, mekanisk styrke på master og fundament, samt auka krav til elektriske avstandar ved auke av spenningsnivået frå 300 kV til 420 kV. Eksisterande leidningar må derfor erstattast med nye. Heller ikkje Mauranger stasjon egner seg for ombygging til 420 kV», skriv Statnett i meldinga.

Jordkabel

I utgangspunktet ser Statnett for seg å byggja ny leidning parallelt med eksisterande, men det er nokre strekningar med fleire moglege løysingar. Det vil føra for langt å gå inn på alle detaljar, men mest interessant er kanskje Rosendal, der det har vore stort engasjement om saka.

Slik Grenda tolkar Statnett si melding, har dei gått bort frå luftleidning gjennom bygda, slik det er i dag. I staden ligg det føre to alternativ for luftleidning, som handlar om å plassera mastene i bakkant av Baroniet og Hatteberg og opp mot Melsdalen. Men Statnett har også teke med eit jordkabelalternativ. Den eventuelle jordkabelen vil i stor grad følgja dagens trasé. Kabelen skal starta i Omshagen (på andre sida av elva for Avlsgarden) og enda i Kalvatre, rett nord for Fredheim Gartneri. Strekninga er på 1 kilometer.

«Det må etablerast muffestasjonar i begge endar av kabelanlegget. Ein muffestasjon er overgangen mellom kabelanlegget og luftleidning. Arealbehov for å dekka tomt for muffeanlegg, sikring, tilkomst for vedlikehald etc. er typisk i storleiksorden 6.000-10.000 m2», informerer Statnett.

Sjøkabel

Frå Rosendal og nordover ligg det føre tre alternativ, alle luftleidningar. Den eine traseen går på sida av dagens, den andre går over fjellet litt innanfor Skålafjell, medan den tredje går inn dalen eit stykke i retning Myrdal, før den går til fjells og passerer på austsida av Krokavatnet.

Sjøkabel frå Omvikdalen til Nes i Rosendal har Statnett droppa. Årsaka er at det er vanskeleg å finna areal til muffestasjonane grunna jordbruk og terrenget elles. I tillegg er fjorden her registrert som gyteområde for torsk.

Førebelse estimat viser at oppgradering av heile strekninga Blåfalli-Samnanger vil kosta mellom 3,3 og 4,8 milliardar kroner.

Den siste meldinga gjeld Samnanger til Øygarden, men den hoppar vi glatt over.

Oppstart i 2029

No kan alle som ynskjer koma med høyringsinnspel. I denne runden ynskjer NVE spesielt innspel på følgjande:

• Manglar i Statnett sitt forslag til konsekvensutgreiingar, eksempelvis tema eller spesielle lokale forhold som ikkje er vareteke og metodar som bør nyttast til særskilde tema i utgreiingane.

• Innspel til Statnett sine melde leidningstrasear.

• Om det er nye trasear som bør greiast ut utover dei som er melde.

«Det er fyrst etter høyringa av konsesjonssøknadene seinare i prosessen NVE vil ta stilling til om Statnett skal få lov til å byggja kraftleidningane. Vi gjer derfor merksame på at innspel for eller mot tiltaka, under dette behovet for tiltaka, er mindre relevante i denne høyringa», understrekar NVE.

Fristen for innspel er 16. januar 2025. Før den tid vil NVE vil halda opne møte om tiltaka.

Statnett har som mål å setja i drift den nye leidningen mellom Blåfalli-Mauranger-Samnanger i 2033. For å rekka det bør utbygginga starta opp i løpet av 2029.