No er det endeleg bestemt kvar dagsturhytta kjem

Onsdag kveld gjorde levekårsutvalet endeleg vedtak i saka om plassering av dagsturhytta.

 

I haust føreslo kommunedirektøren at dagsturhytta skulle byggjast ved Nautavatnet i Fjellhaugen-området, men etter eit ganske stort engasjement blant mange innbyggjarar, bestemte levekårsutvalet at saka skulle sendast attende til administrasjonen for ytterlegare utgreiingar.

I november vart det så skipa til eit arbeidsmøte med utvalet saman med Vestland fylkeskommune og administrasjonen i Kvinnherad kommune. Då vart fem område peika ut til å vurderast på ny. Utvalet bad spesielt om å sjå om det kunne finnast fleire alternativ i Uskedalen.

Dei fem alternativa var: Hatlestrand (to lokalitetar), Nautavatnet, Uskedalen, Bogsneshalvøya ved Husnes, og Storemyr/Tofteåsen på Halsnøy.

 

Grunneigarane

Sidan den gong har folkehelsekoordinator og sakshandsamar Kristian Helgesen vore på synfaring alle stader, samt kontakta dei fleste grunneigarane. Men då sa grunneigarane på tre av stadene nei til å få slik hytte etablert på sin eigedom. Dette av ulike årsaker som jakt og beite.

Då levekårsutvalet hadde møte onsdag kveld, var difor innstillinga igjen Nautavatnet. Og denne gong vart forslaget samrøystes vedteke.

Men politikarane ytra sterke ynske om å få fleire dagsturhytter andre stader i Kvinnherad etter kvart. Hatlestrand vart trekt fram, det same vart Halsnøy. Også Bremstølen vart nemnt.