– No blir ting tatt tak i

Leiar i kontrollutvalet, Knut Førland, er glad for at dei har sett varslarordninga på agendaen.

– Det er lite vi får gjort med det som har skjedd, men vi kan læra av det, skjerpa rutinane og sørga for ei betre oppfølging av varsel i framtida, seier Knut Førland.

Det seier han etter å ha lese om to varslarhistorier i lokalavisene den siste tida.

– Det er veldig bra at desse sakene kjem fram i lyset, og begge desse har bidrege til at det no blir gjennomført ei kartlegging og undersøking av varslingsrutinane i kommunen, og ikkje minst korleis varsel vert følgd opp. Eg ser i media at vår tidlegare ordførar seier at det skal utførast ei gransking, men ein forvaltningsrevisjon er meir korrekt. Eg vil elles gi stor honnør til Lata Marie Avsnes Hauge og Møyfrid Kristoffersen som tek belastninga med å stå fram og løfta sakene sine opp i det offentlege rom. Det står det stor respekt av, seier Førland.

På agendaen

Leiaren i kontrollutvalet fortel at Deloitte i næraste framtid startar opp sine undersøkingar av varslarordninga i Kvinnherad kommune.

– No blir ting tatt tak i, og kontrollutvalet ser fram til den føreståande kartlegginga og undersøkinga som kommunestyret har bedt oss gjennomføra, seier han og held fram:

– Varsling av kritikkverdige forhold er ein svært viktig del av helse-, miljø- og tryggleiksarbeidet. Gode rutinar på dette er viktig, men viktigast av alt er at rutinane blir følgt opp, og at alle tilsette har tillit til varslarordninga.

Førland var sjølv til stades i kommunestyremøtet i juni for å orientera politikarane om at eit samla kontrollutval ynskte å løfta varslingsproblematikken opp.

– Det var ikkje utan grunn at kontrollutvalet gjekk til det ekstraordinære steget å be om å få orientera kommunestyret. Det var eit signal om alvoret i sakene, men også viktigheita av at mottekne varsel og bekymringsmeldingar blir tatt på alvor, seier Førland

Eit utval som har hatt eit krevjande arbeid med desse sakane.

– Arbeidet med desse sakene har vore svært belastande, både for utvalet som heilskap og einskildmedlemer. Som leiar i kontrollutvalet er eg likevel svært glad for at vi har sett varslarordninga på agendaen, og ikkje minst at det er eit samstemt utval som står bak dette, seier Førland.