Nissane regjerer i Steinparken

Kanskje nokre av nissane har funne fram til Steinparken sjølve, men dei fleste er plasserte der av vanlege turgjengarar.

Dei som har vitja Steinparken i Rosendal dei siste vekene, har garantert kome i julestemning. For store deler av parken er okkupert av nissar i mange fasongar. Nokre bur under steinar, nokre har gøymt seg i mosen, medan andre kviler inntil trestammene.

– Vi hadde eit lite «forprosjekt» i fjor, men slik det ser ut no er fyrste gong, fortel Øystein Skaala i Steinparken.

Han opplyser at opptakten var det Britt Jorunn og Jostein Nerhus som stod for. Dei la også ut melding på Facebook og oppmoda turgåarar til å setja ut eigne nissar i parken. Mange familiar har slege til på invitasjonen. Nissane er lettast å finna på dagtid, men parken er også eit syn i mørket.

– At folk viser ein så tydeleg lokal eigarskap til Steinparken er veldig kjekt, seier Skaala.

Han legg til at det er lagt fram straum for å lysa opp deler av pynten. Mellom anna sytte Atle Fredheim for at barnehagehytta har fått ljos på seg.

 

Årshjul

Utanom nissane kan publikum sjå eit tre pynta med barneteikningar og den fantastiske ørna som Kjell Musland har skore ut av ei trestamme.

– Det er veldig kjekt å sjå steinparken slik som dette. Til vanleg ville det vore stille der oppe på denne tida, men no har vi funne endå ei ny bruksform. Vi ynskjer jo å få til heilårsdrift, med ulike aktivitetar gjennom året. Vi har dessutan laga eit årshjul, og har ein del ting på gang framover, røper Øystein Skaala.