Ni Kvinnherad-kyrkjer får støtte i nasjonalt løft for kyrkjebygg

Onsdag blir bevaringsstrategien for kulturhistorisk verdifulle kyrkjebygg lagt fram av regjeringa. Strategien viser korleis pengane frå Kyrkjebevaringsfondet skal nyttast, og kva kyrkjer som er omfatta av dei tre bevaringsprogramma i strategien.

– Bevaringsstrategien er starten på ei historisk satsing og eit historisk samarbeid. Regjeringa vil sikra at me dei neste 20–30 åra skal bruke inntil 500 millionar kroner årleg på å sette i stand kyrkjebygg. For Kvinnherad er det særs gledeleg at heile ni av kyrkjene våre er med i dette grunnlaget, uttrykkjer stortingsrepresentant Hans Inge Myrvold (Sp) i samband med at bevaringsprogramma vart offentleggjort onsdag.

To automatisk freda

– Eid, Holmedal, Uskedal, Fjelberg, Ølve, Åkra, Ænes, Varaldsøy og Kvinnherad kyrkjer er med, enten som del av at dei er automatisk freda (Ænes og Kvinnherad kyrkjer, journ.merk), eller har verneverdi av nasjonal verdi. Dette vil bidra til at fellesrådet saman med kommunen kan lage ein aktiv bevaringsstrategi lokalt, som vil gje rom for gode framtidsretta investeringar for å ta vare på kanskje våre fremste kulturhistoriske bygg, kommenterer Myrvold i ein e-post til Grenda.

Det betyr at dei tre Kvinnherad-kyrkjene som er ute av det gode selskapet, er Husnes, Valen og Hatlestrand kyrkjer.

No vert strategien lagt ut på høyring, der kommunane vert invitert kome med høyringssvar. Men dette skjer med kort tidsfrist, då regjeringa ynskjer å få alle brikker på plass til revidert nasjonalbudsjett før sommaren.

– Ein kan allereie i inneverande år koma i posisjon med å starta arbeid på fleire kyrkjer, melder Myrvold vidare.

Ein viktig kulturarv

I tillegg til å vere ein grunnleggjande del av truslivet og den landsomfattande folkekyrkja, er kyrkjene ein viktig del av den norske kulturarven.

– Kyrkjene fortel om opptil 1000 års kulturhistorie og viser noko av det ypperste Noreg har produsert innan arkitektur, kunst og handverk. Kyrkjebygga, og gravplassane rundt, er viktige kjelder til både kunnskap og opplevingar. Dei fortel mellom anna om korleis det religiøse livet har vore levd, og dei fortel om arkitekturhistorie, handverkstradisjonar og materialbruk opp gjennom tidene, seier klima- og miljøminister Andreas Bjelland Eriksen (Ap) i ei melding om bevaringsprogramma.

Det blir også peika på at kyrkjene har hatt ei viktig administrativ rolle for statsapparatet, og er slik sett også ei kjelde til norsk politisk historie.