Nesten 60 elevar på tur til Svelgabreen

– Det vart ei stor oppleving, seier Berit Kristine Rolland, ei av lærarane som var med.

Onsdag 2. oktober vart den store reisegruppa køyrt med buss til den siste kraftstasjonen før Møsevatn. Derifrå gjekk dei til SKL si hytte i Kjerringbotn. Der slo elevane leir i teltlag som dei hadde planlagt sjølve. På kveldstid gjorde stjernehimmelen stort inntrykk.

– Elevane berre låg på berga og berre såg opp. Dei var nokså overvelda over kor mykje av stjernehimmelen ein kunne sjå når alt anna var mørkt rundt dei. Dei kjente att fleire stjernebilete, fortel Rolland.

Adrenalinkick

Dagen etter gjekk heile gjengen opp til Svelgabreen. Husnes ungdomsskule er heldige med å ha to lærarar som i tillegg er breførarar. Rune Aksnes og Anne Kristin Griggs tok med seg elevane i grupper opp på breen, medan andre venta på tur. Sidan valfagsklassen består av elevar frå både 8., 9. og 10. steg, vart brevandringa tilpassa kvar enkelt gruppe.

– Det var mykje adrenalin inn i biletet då dei skulle opp på breen. Dei vart utstyrte med stegjern, hjelm og isøks, og gruppene gjekk i taulag. Det var veldig nøgde då dei kom ned att frå breen, smiler Berit Kristine Rolland.

Elevane fekk læra mykje om både natur og om påkledning på denne turen, sidan dei fekk kalde netter. Men fredag kunne dei pakka ned leiren og starta haustferien med mange nye inntrykk og opplevingar i sekken.