Neste års kalender har kome frå trykken – godkjent av Remi
Tradisjonen tru får Grenda hjelp av Remi Nerhus når den nye Grenda-kalenderen skal pakkast ut. Han nikkar nøgd når han har fjerna innpakninga.
– Dette var bra. Biletet mitt vart ikkje med, men det gjer ingenting, kalenderen er fin, seier han.
Nokre minutt etterpå har alle butikkar på senteret fått levert Grenda-kalenderen av Remi, før han køyrer med den raude scooteren sin til bedrifter på Seim og leverer der.
Annonse
10 år med innsendte bilete
Kalenderen for 2025 har som vanleg flotte bilete frå heile kommunen, sendt inn frå lesarar, ein tradisjon som no har 10års-jubileum, sidan lesarbilete har pryda Grenda-kalenderen sidan 2015.
Grenda overtok produksjonen av denne kalenderen i 2013 etter at Kvinnherad Sparebank slutta å produsera sin.
Dei som er interessert i ein kalender, kan koma og henta i redaksjonen til Grenda i Rosendal, eller på biblioteket på Husnes. Me skal også distribuera ut til større bedrifter dei neste vekene.
