Nedgangen i arbeidsløysa held fram

I følgje NAV Sunnhordland kan denne nedgangen sjåast i samanheng med avviklinga av ei rekkje mellombelse koronareglar frå 1. april på dagpengeområdet.

– Arbeidsløysa verkar stabilisera seg på eit nivå me ikkje har sett før finanskrisa. Nedgangen frå mars ser me i samanheng med regelverksendringa 1. april, og at me har 52 færre permitterte i april 2022, mot førre månad, seier Håvard Lægreid, leiar i NAV region Sunnhordland.

Ei gruppe aukar

Medan arbeidsløysa held fram å gå ned i regionen, gjeld ikkje dette for alle. Gruppa med personar som står utanfor arbeidslivet grunna helsemessige eller sosiale forhold har i Sunnhordland vakse med over 200 personar sidan 2019.

«For å sikre at så mange som mogleg er i arbeid og får nyttiggjort seg av sin kompetanse, er me avhengig av eit retta fokus på tvers av fleire sektorar.» heiter det i pressemeldinga.

– Denne utfordringa er stor, og kan ikkje løysast av éin aktør åleine. Me er avhengig av å sjå saman på ulike løysningar, der arbeidsgjevarane sitt behov står i sentrum. Gjennom å gi tett og individuell oppfølging, kan me hjelpe den enkelte å nå sitt mål om arbeid, seier Lægreid vidare.

Samarbeid blir trekt fram som ein nøkkel for å lukkast.

Sunnhordland under landssnittet

I Kvinnherad er prosenttalet på heilt ledige i Kvinnherad 1,1 %, med 72 personar. I Sunnhordland er det i april lågast arbeidsløyse i Tysnes kommune (0,9 %), medan den er høgast i Bømlo kommune (1,5 %).

Snittet for heile Sunnhordland er på 1,3 prosent, som er lågare enn gjennomsnittet for både Vestland (1,8 %) og landet (1,9 %).