Nedbørsfattig november

Det er heilt som normalt at Matre er bygda med mest nedbør i Kvinnherad, så også i november. Men 139,7 millimeter er likevel ikkje nokon katastrofe, og slett ikkje når vi samanliknar med fjoråret. Då kom det nemleg meir enn dobbelt så mykje nedbør, nærare bestemt 337,3 mm.

På 2. plass på nedbørstoppen i november hamna Ølve, medan Omvikdalen sikra seg bronsen. Den fjerde og siste bygda som noterte meir enn 100 millimeter, var Husnes.

– Ein fin november, konstaterer Birgit Mørkve Hjelmeland i Omvikdalen.

I motsett ende av skalaen har vi ein sjeldsynt vinnar. Det var faktisk i Austrepollen det vart registrert minst nedbør denne månaden. Målestasjonen der tok berre i mot 62,4 mm, mot 205,5 i fjor. Her gjekk sølvet til Sæbøvik og den siste medaljen til Rosendal.

Snø og vind

Som de ser vart november 2023 mykje finare enn utgåva eitt år tidlegare. På det jamne ser vi at nedbørsmengda var dobbelt så stor i fjor. Totalt etter dei 11 fyrst månadane er stoda at 2023 har vore eit par hundre millimeter tørrare. Største differansen finn vi i logisk nok i område der det er mest nedbør. Det betyr at i Matre er det heile 807,3 millimeter i skilnad, i Omvikdalen er talet 650. Tilsvarande er det små forskjellar der det regnar lite, som i Sæbøvik der skilnaden berre er på 48,1 mm.

November baud på mange heilt nedbørsfrie døger. Tre av bygdene hadde 20 eller fleire; Omvikdalen, Rosendal og Sæbøvik. Valen måtte nøya seg med 15. Underlagsmaterialet avslører elles at veldig mykje av nedbøren som falt kom den 22. og 23. november.

– Vonar desember vert like fin med snø og lite vind, seier Birgit Mørkve Hjelmeland.

Dei historiske tala frå Hydro Husnes fortel at vi ikkje skal lenger tilbake enn 2019 for å finna den tørraste månaden sidan 1966. Då falt det utruleg nok berre 12,4 millimeter. Det våtaste året er 2006 med nesten like utrulege 422,6 mm.

Eksepsjonelt

Termometeret seig temmeleg langt ned på den blå sida førre månad. Både Omvikdalen og Matre nådde under minus 7. Det var ein kuldeperiode i midten av månaden, i tillegg var den siste veka kald. Men det var også veldig varmt på det varmaste. Den 3. november slo Husnes til med 14,0 grader. Snittet for heile året er no på 9,14 grader, målt i Uskedalen.

I den større samanhengen er det interessant at november i Norge enda 3,5 grader under normalen. Kaldast var det i Kautokeino den 14. med minus 31,8 grader. Men globalt vart november den sjette månaden på rad med rekordhøge temperaturar. Klimaforskarar kalla tala for oppsiktsvekkande.

– Det er veldig uvanleg at det har vore rekordvarmt så mange månader på rad. Det er heilt eksepsjonelt at det er så store sprang frå tidlegare rekordar, seier Reidun Gangstø, klimaforskar ved Meteorologisk institutt, i ei pressemelding.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Anders Gjerde), Rosendal (Jan Eik), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. november:

20239,14

20229,83

20219,25

20209,74

20199,15

20189,59

20179,7

20169,02

20159,3

201410,9

20138,4

20128,5

20119,7

Kjelde: Kurt Haugland, Uskedalen