NAV Vestland: 16,4% av innbyggjarane i Kvinnherad er registrert med helseutfordringar

Fredag 6. mai vart tala presentert av NAV Vestland i ei pressemelding, der statistikken omfattar vestlendingar som er registrerte hos NAV med nedsett arbeidsevne og/eller uføretrygd i 1. kvartal. Tala på denne gruppa auka då pandemien starta.

I Kvinnherad viser tala frå første kvartal 2022 at 397 personar var registrert med nedsett arbeidsevne, 927 personar var registrert som uføre. Til saman er 16,4% av befolkninga i kommunen registrert som ufør eller med nedsett arbeidsevne.

Modalen kommune toppar lista, der 20% av befolkninga er registrert med nedsett arbeidsevne eller som uføre. I andre enden av skalaen finn ein Eidfjord, der 9,9% av innbyggjarane er registrert i NAV med helseutfordringar.

Auken uroar

Auken uroar direktøren i NAV Vestland, sjølv om Vestland er eitt av fylka som har færrast personar registrert med helseutfordringar.

– Auken er størst blant dei under 30 år, og det gjev grunn til uro. Det er ikkje bra, korkje for den enkelte eller for samfunnet, at så mange står utanfor arbeidsmarknaden på grunn av helseutfordringar, seier Anne Kverneland Bogsnes i pressemeldinga.

Kan bety mykje å bidra gjennom jobb

Bogsnes peikar vidare på at fokuset bør liggje på å få personar som har moglegheit til å jobbe sjansen til dette.

– Det er stort behov for arbeidskraft, og vi veit at det kan bety mykje for den enkelte sin livskvalitet å få lov til å bidra i samfunnet gjennom ein jobb, seier ho.

Ut frå plansjane NAV Vestland har utarbeidd i samband med tala som blir presentert, ser ein at auken i personar registrert med nedsett arbeidsevne eller uføretrygd har hatt ein markant auke sidan 2020.