Nav-samarbeid for å få fleire helsefagarbeidarar

I mars har NAV i region Sunnhordland registrert 1,5 prosent heilt ledige av arbeidsstyrken, og ein oppgang på 67 heilt ledige personar i høve februar månad.

– Arbeidsløysa aukar, men er framleis låg. Den primære drivaren for auken denne månaden er at fleire av dei permitterte er heilt utan arbeid i perioden. Me trur denne situasjonen snur i heilt i april, seier Håvard Lægreid, leiar i Nav region Sunnhordland i ei pressemelding i samband med månadstala til Nav.

Treng arbeidskraft

I mars månad vart det registrert 321 ledige stillingar i regionen.

– Dette er eit lågare tal enn månaden før. Påsken gjer i år statistikkmånaden mars veldig kort. Om me ser på tilgang stillingar i snitt per verkedag, er tilgangen i mars tett opp til tilgangen i februar, om enn noko lågare. Helse-, pleie og omsorg er den næringa med flest utlyste stillingar (177), med god margin over den med nest flest, som er IKT- og ingeniørfag (28), leier Lægreid vidare i pressemeldinga.

Etterspurnaden frå arbeidsgjevarane i regionen held seg høg. Helse- og omsorgssektoren har lenge stått for ein stor del av etterspurnaden. Faktisk utgjer etterspurnaden frå desse yrka over halvparten av stillingane me har tilgang til i mars, seier Håvard Lægreid.

Samarbeid for å få fleire helsefagarbeidarar

I Sunnhordland har NAV, saman med Vestland fylkeskommune, og alle kommunane i Sunnhordland starta eit prosjekt for å rekruttera fleire inn i helefagarbeidaryrket. Prosjektet er lokalt initiert av NAV Bømlo og Bømlo kommune for å hjelpe fleire mot ein helsefagleg utdanning. Sektoren har store behov allereie, og NAV trur behova vil vera store fram i tid også.

– Me er i gang med å leita etter kandidatar til dette kvalifiseringsløpet. Me har veldig tru på at dette kan føra til fleire aktuelle kandidatar til dette yrket, og har mellom anna frå tidlegare god erfaring med Menn i Helse. Me er veldig glade for at kommunane i regionen vår er med på denne typen prosjekt, der me både får inkludert fleire i arbeidslivet men samstundes bidreg til å dekka behovet i ei særleg viktig næring, seier Lægreid