Nausteigarar får høgare eigedomsskatt

– Ein har tolka lova feil tidlegare, konstaterer kommunedirektør Ragnhild Bjerkvik og rådgjevar for eigedomsskatt Per Harald Havnen Löfgren Johansen under eit raskt innkalla møte med pressa torsdag.

I ti års tid har naust og garasjar som står på eige gards- og bruksnummer blitt skatta etter same sats som bustadhus og fritidsbustadar. Bustadhus og fritidsbustadar har vore skattlagde med 1,7 promille av 70 prosent av taksten til eigedommen. Naust og garasjar har same sats som næringseigedommar og kraftverk, som er sju promille berekna på 100 prosent av taksten.

I praksis betyr det at ein stad mellom 600 og 800 naust – fordi garasjar på eige bruksnummer er det få av – kjem til å få ein monaleg høgare eigedomsskatt å betala i framtida.

– Det er slik at eit naust som var taksert til 400.000 kroner i 2011 har vore skattlagd kring 450 kroner i året. Eigentleg skulle det vore kring 2800 kroner i eigedomsskatt på ein slik eigedom, forklarer Løfgren Johansen.

Ikkje restskatt

Eigarane til eigedommane som har vore skatta feil kjem ikkje til å få krav på seg for åra som har gått.

– Dette er ein feil som har vore gjort frå Kvinnherad kommune si side, og me har korkje lyst eller lov til å krevja inn noko frå tida fram til i år. Me har heller ikkje tenkt at denne auken skal gå som ein auke i budsjettet for 2022, seier Bjerkvik.

Kvinnherad kommune har førebels budsjettert med 90 millionar i inntekt frå eigedomsskatt i 2022. For å halda seg på det nivået, er forslaget frå kommunedirektøren å leggja satsen på bustader og fritidsbustader ned til 1,4 promille.

– Det er den enklaste måten for oss å justera dette på, kommenterer kommunedirektøren.

Kvinnherad kommune er i gang med ny runde med taksering av eigedommar, og dei fleste kan venta seg ein ny takst frå neste år av. Spesielt kan nausteigarar venta seg det, då prisen på naust har gått monaleg opp dei siste ti åra.