Nasjonal vardetenning på Ranchen på Valen

I Kvinnherad vil arrangementet i år gå føre seg på Ranchen, tidlegare kjent som Ritellet på Valen.

– Ståle og Torill har stilt hestesenteret sitt til disposisjon. Dei vil også ynskja velkommen til gards. Får me det til, blir det tent varde både på Kokkelberg, og nede på Ranchen. Lars Werner Solheim har teke på seg å tenna varde på fjellet. Frå den vil ein hesteekvipasje med faklar ta seg ned på garden – å tenna på varden der. Me trur det blir veldig tøft, skriv Annemor Ekeland i ei pressemelding.

Håkon den gode Adalsteinsfostre etablerte vardetenning i Norge midt på 900-talet. Formålet var å varsla om krig og ufred i landet.

– Motvind Norge har tatt opp att denne tradisjonen og arrangerer no for femte gong Nasjonal vardetenning over heile landet. Dette gjer ein for å marker den sterke motstanden mot vindindustrien på land, forklarer Ekeland i pressemeldinga.

Ho meiner aksjonsgruppa til «Nei til vindkraft i Kvinnherad» har laga eit godt program som høver for heile familien. Kvelden startar med tamburmajor Tormod Kayser som slår arrangementet i gang, noko som er blitt tradisjon.

Vindkraftmotstandaren og tidlegare forsvarsmann Lars Børge Sæberg vil halda ein appell.

– Kanskje han ser kampen me fører mot vindkraft som å vera i heimevernet, spør Ekeland.

Nyvalt leiar i Naturvernforbundet Kvinnherad og medlem i aksjonsgruppa Mari Teigen Varanes vil også halda appell.

– Det er grunn til å tru at tema vert å ta vare på naturen vår, vurderer Ekeland.

På programmet står også diktlesing av gardskona Torill, og song og musikk ved brørne Eikemo.

Aksjonsgruppa lover at det skal bli lett å finna vegen til Ranchen for dei som ikkje er kjente der