Hardeland: - Må evaluera prosjektet

Øyvind Hardeland vart overgitt då han fekk høyra kostnaden på tilkomstvegen til Kvinnherad Arena.

I kommunestyret torsdag kveld spurde Øyvind Hardeland (Ap) om kva totalprisen på «Arenavegen» vert, inkludert asfalt, vegljos med meir. Ordførar Hans Inge Myrvold (Sp) opplyste at ein samla sett har brukt 30,5 mill. inkludert moms hittil. I tillegg kjem attståande tiltak som asfaltering og fortau, som er estimert til 2,6 mill. inkl. moms. Overskridingane skuldast i hovudsak grunntilhøva.

Øyvind Hardeland konkluderte at sluttsummen vert høgare enn forventa.

– Konsulentane oppi det heile, har dei noko ansvar? Når det blir dobbelt så dyrt, så må vi evaluera det. Vi hadde jo lokale entreprenørar som kom med meir realistiske estimat. Eg slit litt med konsulentar, vi må prøva å gjera meir sjølve, sukka han.

I ei melding til Grenda avviser ordførar Hans Inge Myrvold at tilkomstvegen vart dobbelt så dyr. Han opplyser at kommunestyret den 28.02.2019 vedtok oppstart av arbeidet med tilkomstveg (budsjett 17 MNOK inkl. mva), og opparbeiding av tomt med uteareal (parkering m.m.) til idrettshallen.

– Kostnadane med opparbeiding tomt med meir var ikkje talfesta i vedtaket, men skulle dekkast inn med deler av avsette midlar til idrettshall. Tomtekostnadane vart før konkurranse kalkulert til om lag 10 MNOK inkl. mva. Vegljos, høgspent, bygging trafo m.m. er utført. Samla sett er det til alle desse tiltaka brukt 30,5 MNOK inkl. mva. Dette gir ei overskriding, som i hovudsak skuldast krevjande grunntilhøve m.m. Legging av asfalt og bygging av fortau er ikkje gjennomført, estimert kostnad om lag kr 2,6 MNOK inkl. mva. Dette arbeidet vert finansiert med omfordeling av unytta investeringsmidlar, slik meirkostnaden med Kvinnherad Arena også i stor grad vil bli finansiert (ref. KS vedtak 29.04.2021). Mva- refusjon er ein del av finansieringsgrunnlaget for Kvinnherad Arena, skriv han.

Saka vart oppdatert med kommentar frå Hans Inge Myrvold måndag kl. 19.50.