Namnet blir Skyss
I Hordaland heitte kollektivselskapet Skyss, medan kollegaen i Sogn og Fjordane bar namnet Kringom. Etter samanslåinga til Vestland har det vore diskutert kva ein skal kalla det nye fellesselskapet.
Fire alternativ vart vurderte, men eit samrøystes fylkesutval har no avgjort å gå for Skyss. Før valet vart gjort, vart det gjennomført ei fagleg vurdering med bruk av ekstern kompetanse.
Artikkelen held fram under annonsen.
«Vurderingane er gjort både knytt til kostnad, praktiske konsekvensar for omprofilering, samt dei ulike målgruppene si oppleving av eit eventuelt namnebyte», skriv fylket.
Ei undersøking viser at nesten 9 av 10 i Hordaland kjenner Skyss, mens færre enn 4 av 10 kjenner Kringom i Sogn og Fjordane. Det er også lagt vekt på den visuelle og praktiske koordineringa mellom Skyss-merkevara og Bybanen.
Det vil ta om lag 12 månader frå ein startar til heile bussparken til Kringom er omprofilert til Skyss. Kostnaden på arbeidet er stipulert til rundt 7 millionar kroner. Om fylket hadde valt Kringom, hadde prisen stige til 29 millionar. Eit nytt namn hadde kosta 38 mill.