Nærmar seg kafédrift på Husnes
– Tanken er å opna 15. juni, og dette ser ut til å gå heilt fint. Papirarbeidet fekk me fullført i går, og det utstyret me ventar på kjem no litt etter litt. Det meste skal vera på plass til neste veke, reknar me med, slår Tommy Persson i Bra Lunsj fast, knappe to veker før verksemda opnar kafé i Husnes storsenter.
Publisert
Då Grenda er innom lokala deira på Sæbøvik er dei i full sving med eit ukjent tal snittar som skal køyrast ut. Ei barselgruppe har nyleg takka for seg i dei nyoppussa lyse selskapslokala dei har brukt vinteren på å setja i stand.
Annonse
I tillegg skal dei ferdigstille nye lokale og meny for søsterverksemda til Bra Lunsj; Bra Lunsj Café.
Etter at Yngves konditori kasta inn grytekluten i 2020, har det vore fleire som har prøvd seg på kafédrift i det pulserande hjarta på Husnes storsenter. Men det har ikkje vore mogleg å kjøpe tebrød og svart kaffi med påfyll i desse lokala sidan Kafé Samspel AS stengte dørene i haust.
Barndomsdraumen
Persson erkjenner at kafédrift ikkje er noko ein nausynt blir rik på, men ved å starta opp med dette er det ein barndomsdraum som går i oppfylling.
Annonse
– Heilt sidan eg var liten har eg hatt ein draum om å driva kafé. Ein stad der folk kan prate og kjøpe seg litt mat og drikke. Det er mys! seier han.
Men når dei går i gang med kafédrift blir det av den meir moderne typen, der folk like godt kan hente seg take-away som å sitja der å nyta. Menyen er enno ikkje heilt klar, men det grøvste er på plass.
– Det blir kaldmat, som salatar, baguettar og wraps. Litt meir moderne, og slikt som folk like godt kan ta med seg. Det skal vera litt for alle, men me satsar ikkje på det tradisjonelle, forklarar Persson.
– Og så vil me jo ha donuts i mange forskjellige variantar, legg Charlotte Eide Berntsen til.
Dei lovar nokre tradisjonelle smakar òg, berre i ny og moderne innpakking. Med det held dei fram i Bra Lunsj-ånda; trendy, enkle og smakfulle godbitar.
Nye fargar, lyst og koseleg
Annonse
Sjølv om dei enno ventar på delar av inventaret som skal møblera den nye kaféen, har dei mellom anna malt veggene og fornya kjøkenet.
– Det var mørke vegger då me overtok, men no har me malt dei i litt lysare fargar. Me vil at det skal vera innbydande å gå inn der. Når det har vore stengt så lenge trur eg det er mange som er spent på korleis det blir. Så får me sjå det litt an undervegs, korleis det utviklar seg, kor mange folk me treng i jobb der, funderer Persson.
Til den første tida etter opning har dei sikra seg godt med arbeidskraft, og dei meiner det er eit godt team dei har sett saman. Charlotte vil vera på kafeen både under opninga og i oppstarten, men Tommy vil ikkje få med seg heile opninga, då han er ute på grill-oppdrag den dagen.
Satsar på kontantlaus betaling
Dei som tek turen på kafé 15. juni kan truleg sjå fram til nokre smaksprøvar, eit koseleg og innbydande lokale med sitjeplassar til rundt 30 personar, smaksrik kaldmat, samt eit variert utval donuts og spanande kalde drinkar i ny vri.
– Er det elles noko kundane kan ha godt av å vite om før de opnar?
Annonse
– Me vil prøva oss på kontantlaus betaling. Dette vil vera bra for effektiviteten for vår del, og alle har jo betalingskort i dag. Me håpar kundane har forståing for dette, sluttar Persson.
