Nærmar seg endeleg vedtak

Optimismen er stor blant dei som ivrar for Fjelbergsambandet, for no er det berre eit positivt vedtak i Vestland fylke som står att. – Eg forventar full tilslutnad i fylket, seier Sigbjørn Framnes (Frp).

 

Fredag føremiddag var sentrale personar i arbeidet for å realisera Fjelbergsambandet samla i prestegarden på Fjelbergøy. Frå Framstegspartiet stilte stortingsrepresentantane Helge André Njåstad og Silje Hjemdal, fylkespolitikar Sigbjørn Framnes og kommunepolitikar Ove Lemicka. Senterpartiet var representert ved Marianne Nordhus, som òg er styreleiar i Fjelbergsambandet AS, og ordførar Hans Inge Myrvold.

Gjengen frå Frp hadde til og med overnatta i Prestegarden.

– De har verkeleg ei perle her, roste Silje Hjemdal.

Utifrå det forsamlinga kunne fortelja er det no all grunn til å tru at sambandet vert realisert.

– Alle er for. Kor vi enn kjem, om det er på Stortinget eller andre stader, så er det stor støtte å få, fortalde Ove Lemicka.

– Eg opplever ikkje noko politisk motstand, bortsett for frå dei partia som alltid er imot vegar. Eg ser ikkje kva som kan stoppa prosjektet no, følgde Sigbjørn Framnes opp.

Nøkkelrolle

Framnes spelar ei nøkkelrolle fram mot endeleg vedtak, for han er saksordførar for regional transportplan i fylket. Planen er no ute på høyring, og skal leverast til vedtak i desember 2021. Men Framnes er ikkje sikker på om folket på Fjelberg må venta til dess.

– Når ting ikkje kostar pengar, så kan fylkespolitikarane kasta seg rundt og gjera vedtak utan plan. Eg forventar full tilslutnad i fylket, varsla han.

Helge André Njåstad slo fast at både Kvinnherad kommune og Stortinget har gjort sin del av jobben. Sistnemnde bestemte nyleg at det kan utbetalast ferjeavløysingsmidlar også til trekantsamband som Fjelbergruta. I tillegg er det opna for det han kalla «pukkeleffekt», noko som betyr at ein større del av midlane kan utbetalast tidleg i prosjektet.

– For 2-3 månader sidan var Fjelbergsambandet litt vanskelegare å få realisert enn no. No må berre fylket seia ja til noko som ikkje vil kosta dei éi krone, sa Njåstad.

 

Stor verdiskaping

Marianne Nordhus konstaterte at sjølv om det bur lite folk på Fjelberg, så er det stor verdiskaping på øyane gjennom landbruk og oppdrett. Ho trekte fram at Fjelberg fjordbruk omsette for 416 millionar kroner i 2018.

– Det er så mange argument for, at vi nesten ikkje skjønar kvifor dei ikkje berre set i gang og grev, smilte ho.

– Vi er rett og slett litt utolmodige etter å koma i gang, la Sigbjørn Framnes til.

Forsamlinga konkluderte at sambandet kan stå ferdig om fem år.

– Det må vi klara. Vi må kunna køyra bil hit om fem år, meldte Helge André Njåstad.