Nærmar seg bok

Bjarne Hauge held på med si andre bygdebok, og var førre torsdag i Uskedalen for å samla inn informasjon.

Boka vert rekna som ein oppdatert versjon av Gards- og ættesoga for Kvinnherad bind 3. Området han tek for seg i boka strekkjer seg frå Svoldal ved Ænes til Stensletten i Uskedalen. Til no har han samla og skrive informasjon fordelt over 665 sider. Det er ikkje tvil om at det går mykje tid med til arbeidet.

– Det er nok ingen dagar der eg ikkje gjer noko. Det går fort 4-5 timar dagleg. Familien kunne sikkert sagt meir om det, fortel Hauge med eit smil i munnviken.

I kaffikroken

Den flittige skribenten hadde funne seg godt til rette i kaffikroken på Spar Uskedalen. Her sat han klar med penn og papir for å skrive ned nye eller korrigera gamle opplysingar.

– Det dukkar stadig opp ny informasjon som eg flettar inn eller korrigerer. Det er ein del folk som eg har hatt kontakt med tidlegare som har kome innom for å føye til eller stadfeste det eg har skrive ned, opplyser han.

Seim og Rosendal

Arbeidet med boka går sakte, og sikkert på fram.

– Det går stadig i rett retning. Eg håpar også å få meg ein tur til Seimsfoss og ein til Rosendal i same ærend som i dag på eit seinare tidspunkt. Det er mange positive tilbakemeldingar, kommenterer Hauge.

På spørsmål om når han håpar å verta ferdig med boka, ler han litt før han svarar.

– Det var for to år sidan det. Eg vurderer også å ha med ein del bilete, men då vert det fort 50-60 sider til, så eg må passa meg slik at det ikkje vert for mykje, fortel han før neste person kjem og set seg ned for ein prat.