Myrvold vil bli regionleiar

Stortingsrepresentant Hans Inge Myrvold (39) er mellom dei som har søkt på jobben som dagleg leiar i Hardangerrådet.

Hatlestrendingen er ein av dei sju søkjarane som, i motsetnad til to andre, ikkje har trekt seg.

Myrvold har møtt på Stortinget sidan førre val, som vara for statsråd og partifelle Kjersti Toppe. Han fortalte i Grenda i sommar at han går ut av politikken når stortingsperioden er omme.

– Ei tid etter eg stadfesta og hadde bestemt meg for å ikkje ta renominasjon for stortingsvalet, kom utlysing til stilling som dagleg leiar for Hardangerrådet. Dette kveikte meg, og gav meg stor interesse for stillinga, seier Myrvold til Grenda

Til intervju

– Etter snart 15 år i politikken, både lokalt og no på Stortinget, hadde det vore storarta få arbeidd med regionbygging saman med dei folkevalde i Hardanger, næringslivet og innbyggjarane der. Hardanger har store moglegheiter som eg ser på som veldig attraktivt å få kunne potensielt jobbe med, seier han vidare.

Han fortel at han har vore til intervju og ser fram til den vidare prosessen frå styret i Hardangerrådet.

Søkt har også forfattar, kommunikasjonsrådgjevar i Skyss og tidlegare informasjonsrådgjevar i Kvam herad, Øyvind Strømmen. Det går fram av den offentlege søkjarlista frå Hardanger IKS AS. Det er Hordaland Folkeblad som har etterlyst lista sidan søknadsfristen gjekk ut tidleg i september.

Dei andre søkjarane er Asle Natås Lægreid frå Odda, Ann Irene Myrheim frå Kalvåg, Hans Willy Flisnes frå Ålesund, Sigrid Eitrheim frå Odda og Håkon Gjerde frå Ulvik.

Regionsbygging

– Fleire intervju er gjennomførte. Vona er å tilsetja snart, fortel styreleiar Jon Olav Heggseth i Hardangerrådet IKS til Hordaland Folkeblad.

Hardangerrådet har nytta rekrutteringsbyrårt Capus AS som rådgjevar i tilsetjingsprosessen.

– Sjølv om eg har ei tid att på Stortinget, var dette som sagt ei stilling som kveikte meg med sterk motivasjon for å bidra på ein litt annan måte i regionbygginga for ein veldig attraktiv del av vår landsdel, sluttar Myrvold.