Myrvold har bestemt seg - må velja ny ordførar

Då toppkandidaten til Senterpartiet i Hordaland Kjersti Toppe vart presentert som barne- og familieminister, betydde det samstundes at Hans Inge Myrvold vert fast møtande stortingsrepresentant framover.

Myrvold, som same dagen var i Oslo i anna ærend, hadde ikkje då klart for seg kva han kom til å gjera med ordførarvervet.

– Eg har tenkt mykje på kva eg vil gjera, og vil henta litt meir råd og rettleiing frå stortingsgruppa på dette. Partigruppa heime blir langt på veg den avgjerande på korleis me riggar oss. Det er viktig at potensielle kandidatar i Kvinnherad får dei romma og mogelegheitene som ligg i dette. Førebels er det er ein omstendeleg, usikker og uavklart situasjon, sa den avtroppande ordføraren på torsdag.

Måndag har han fått områdd seg meir.

– Eg ser no er at det mest riktige for meg er å søkja varig fritak ut resten av perioden. Det gjeld for ordførarvervet og formannskapet, og så har eit instendig ønske om å halda tritt med kommunestyret og delta der framover, seier Hans Inge Myrvold til Grenda.

Det betyr at Kvinnherad får ein ny ordførar for resten av den inneverande kommunestyreperioden.

Korta tett til brystet

Nøkkelen for korleis dette blir løyst framover, ligg blant anna i lomma til leiar i Kvinnherad Senterparti Benthe Bondhus. Der ligg nøkkelen førebels godt, og godt skjult for innsyn.

– Eg har ikkje så mykje å tilføra no. Me er i eit prosess nettopp no, og me har samarbeidspartnar som me må diskutera med. Me ønskjer å halda fram å samarbeida vidare med konstellasjonen som har styrt i to år no. Og så må me ta det derifrå, og snakka med dei før me går vidare, seier ho til Grenda.

Det er likevel ikkje tvil om at Senterpartiet sit i førarsetet for korleis dette skal utvikla seg.

– Eg antar at eg skal vikariera for Hans Inge fram til 28. oktober. Etter det så veit eg ikkje kva som skjer. Det er mykje som skal takast omsyn til her, og no skal Hans Inge får områ seg litt, sa dåverande varaordførar – no fungerande ordførar – Hilde Enstad (Arbeidarpartiet) til Grenda på torsdag.

Ho tar følgjene dette får for hennar politiske kvardag med stor ro.

– Eg blir fungerande ordførar no, men Hans Inge er ordførar til han ikkje er det lenger. Me har planlagt at viss Hans Inge Myrvold kom inn på Stortinget, så skulle me møtast og ta vegen vidare derifrå. Dermed skal koalisjonen sine leiarar skal møtast når det passar slik, sa ei svært avslappa Hilde Enstad (Arbeidarpartiet) på torsdag om konsekvensane dette får for varaordføraren.

– Det aller viktigaste i dag er at Kvinnherad har fått ein stortingsrepresentant, og der er enormt stort for vårt kommune. Det er noko heilt anna å ha nokon som er herifrå, som me kjenner godt og som kjenner Kvinnherad godt, understreka Hilde Enstad på torsdag.

Søkjer fritak

Hans Inge Myrvold seier på telefon frå Oslo at det er fleire forhold som har spelt inn i vurderinga av å halda fram i kommunestyret.

– Veljarane valt meg inn for fire år, og kommunestyret er ein veldig viktig arena for meg til å halda meg oppdatert på saker som vedkjem kommunen. Samla sett ser eg at denne regjeringa kjem til å vera ei robust og god samansett regjering, og då kjem eg til å vera i Oslo lenge. Då blir det feil å gje andre premiss til kommunestyret, seier Myrvold.

Han seier han har diskutert mest med seg sjølv når han har landa på si avgjerd.

– Eg hadde ein samtale med gruppa vår på søndag, og prata med varaordføraren same dag, der me gjekk gjennom mange av oppgåvene som står føre oss. Dette er eit scenario ein har vore førebudde på. Eg sender søknaden om fritak i dag, og vonar på handsaming på neste torsdag, seier Myrvold.

Han må sjølv melda forfall til det møtet, då han skal på slottsmiddag same kveld.

– Kongen plar visst å invitera alle stortings- og regjeringsmedlemmene til ein slik middag i starten på valperioden. Det må eg vera, sluttar Myrvold.