Myrvold forsvarer regjeringa: - Overgidd over formannskapet

– Hugs at det er eit samla storting som har peika på at me i denne situasjonen, med dei kraftprisane, så er dette eit riktig grep. Det er full tilslutning i Stortinget til dette.

Det seier stortingsrepresentant Hans Inge Myrvold etter at politikarane i Kvinnherad har hamra laus på den sitjande regjeringa for korleis kommunar med konsesjonskraft blir handsama.

Som kjent for mange har Kvinnherad kommune rett på 160 gigawattimar med straum, som ein kompensasjon for kraftutbygginga som har vore gjort her. Det gir Kvinnherad potensielt høge inntekter når kraftprisane er høge, og som konsekvens av forventa høge kraftinntekter i år, har staten kutta 132 millionar kroner i overføringa til kommunen.

Gjennomgang

Nedtrekk i ramma på konsesjonskraft, som det heile har blitt døypt, har ført til eit opprop frå Landssamanslutninga av vasskraftkommunar (LVK).

Stortingsrepresentant Hans Inge Myrvold (Sp) tar no si eiga regjering i forsvar.

– Det har ikkje kome veldig godt fram at det er eit samla Storting som står bak vedtaket om å gjera det slik. Samtidig er Stortinget tydeleg på at dette må gjerast på rett vis. Ein ser at prisane som låg til grunn (200 øre/kwt) er langt frå der ein er no. Ein vil ha ein fullstendig gjennomgang fram mot revidert statsbudsjett (etter første tertial), for å sjå at dette blir rettast råd, seier Myrvold til Grenda.

Han peikar på at det må vera riktig grunnlag ein gjer dette på, men også etter prinsipp som gjer det rettvist.

– Det er ikkje heilt enkelt heller, om ein skal ta kommunaldepartementet litt i forsvar. Kvinnherad kommune har ein tydeleg marknadsprofil ut over dei ti prosent som er til eige forbruk. Andre kommunar forsyner eigne innbyggjarar. Nokre har lagt fastpris til grunn. Du har også kommunar som har gjort seg til marknadsaktørar, som Ullensvang. Det gjer dette noko meir utfordrande for departementet, meiner Myrvold.

Stortingsrepresentanten ligg til at det likevel må vera ein grunnleggjande rettvisdom som skal liggja til grunn.

– Eg er einig med ordføraren at det må vera like prinsipp, men det er krevjande når det er så ulik forvaltning landet over. Ein legg til grunn at kommunane ikkje skal avkortast for dei første 70 øra, og denne situasjonen skal berre vera i 2023. Ein ynskjer at frie inntekter skal halda fram og vera frie.

Politikken lukkast

– Ja, me i Kvinnherad har gode føresetnader for å koma gjennom krevjande økonomiske periodar, men det er andre kommunar som har store utfordringar knytt til høge kraftutgifter, som Fitjar, Etne og Sveio. Dette er grep for å sikra betre fordeling i ein krevjande økonomisk situasjon, påpeikar Myrvold.

Myrvold meiner at pengepolitikken og dei økonomiske prioriteringane i statsbudsjettet har vore riktig medisin for å få ned inflasjonsbanen og stoppa rentegaloppen i Norge.

– Eg blir overgidd over det somme formannskapsmedlemmer uttaler. Ein har den største inflasjonen sidan 70-talet og ei uroleg internasjonal stode. Eg hadde håpt at ein hadde klart å løfta blikket litt. Eg hadde forventa at den rutinen som sit i formannskapet no skulle vita betre. Når me veit at inflasjonen i Norge er blant dei lågaste i Europa, så viser det at den økonomiske politikken til regjeringa fungerer, og så trur me at me kan gjera det endå betre, seier Myrvold.

Han omtalar ein normalsituasjon for Kvinnherad kommune til å vera frå 35 til 70 millionar kroner i konsesjonskraftinntekter årleg.

– Eg har forstått frå investeringsutvalets leiar at 280 millionar var stipulerte inntekter frå konsesjonskrafta i 2023. Då er det i så fall 150 millionar igjen, peikar Myrvold på.

– Kvinnherad er den einaste kommunen som har avskaffa eigedomsskatt, og kanskje einaste kommunen i landet som har innført gratis SFO. Så ein har jo gjort tydelege prioriteringar, og ein har gjort prioriteringar som andre kommunar berre kan drøyma om. Konsesjonskrafta har vore – og vil vera – utruleg viktig for Kvinnherad, både for næringsutvikling og sosiale ytingar. Det er kompensasjonen for inngrepa i naturen vår, og det skal vera slik. For all kraftutbygging legg ein grunn til at det skal vera slik framover også, sluttar stortingsrepresentanten.