– Mykje terping

Spelarane, som kom frå heile Hordaland, viste stor konsentrasjon og speleglede den stunda Grenda var tilstades. Medan trenarar og foreldre følgde med frå sidelinja, øvde gutane på teknikk, før dei vart delt inn i lag for å spele, før pausen. Tempoet var høgt, likeins som enkelte av ballane og dei spenstige hoppa til forsvaret.

I pausen vart det tid for nokre ord med dei sju spelarane som var representert frå Strand-Ulv. Dei var samde om at slike regionssamlingar var kjekke og lærerike saker.

— Det er veldig kjekt når det er så mange som kjem, sa Eirik Gjuvsland Skjelnes.

Klubbkompis Odin Mikal Uglenes Falck følgde opp med at det er mykje å læra av å spele i lag med andre klubbar, og hinta om at det handla om å læra motstandarar og potensielt framtidige medspelarar å kjenne.

— Dessutan får ein jo god motstand på desse regionssamlingane, og det er jo det ein ser etter, legg David Eikeland til.

Samstundes som god motstand fører til utvikling, er regionssamlingane også ein stad for å øva på teknikk. Undervegs på treninga hadde gutane fått gode attendemeldingar på kva dei gjorde bra og kva dei kunne gjera for å bli betre, noko spelarane såg ut til å setje stor pris på.

— Det går mykje i terping på dei små tingene, slo Håkon Ulvenes Yndestad nøgd fast.

Viktig arena for å bli kjend

Sjølv om laurdagens trening var dobbelt så lang som ei vanleg trening, var det berre god stemning og sjå. Ikkje alle klubbane som var representert kunne melda om like stort miljø som det arrangørklubben kan skilta med, og for fleire av dei tilreisande spelarane var det difor eit stort poeng å ta del i miljøet i regionen som heilskap.

Dei opne samlingane skal gi spelarane inspirasjon og moglegheit for vidare utvikling. Samstundes skal dei styrkje samarbeidet mellom klubbane i regionen. Denne samlinga var nummer to av totalt tre opne samlingar denne hausten, og eit knippe av deltakarane vil til sist bli plukka ut for å representere regionen sitt U16 laget i NM over nyttår.

— Etter den tredje samlinga tek me ut ein bruttotropp på 16 stykke, og så må me sjå det litt an om me reiser ti eller tolv stykke til regions-NM i Oslo, forklarte Martin Bjelland, som leia treninga.

Det var likevel ikkje dette som var i fokus, korkje hos spelarane, trenarane eller foreldra.

— Det viktigste er at spelarane får bli litt kjent med kvarandre, får trent i lag og ha det kjekt, understreka den andre trenaren, Otte Bjelland. Dette var fleire av foreldra som var tilstades samde i.