Måndag kveld inviterte Øyatun skule foreldre, søsken, besteforeldre og andre til juleavslutning i Halsnøy kulturhus. Elevene bydde på seg sjølve, og imponerte med morosame sketsjar, dans og musikalske innslag.Marthe Eide
Mykje talent, men mest lått og løye - sjå biletserie frå juleavslutninga til Øyatun skule her!
Måndag kveld var det duka for den tradisjonsrike juleavslutninga til Øyatun skule i Halsnøy Kulturhus. I over to timar serverte elevar frå alle trinn flotte og humoristiske innslag, til ein fullsett sal av stolte og kanskje litt flaue foreldre.
Elevar frå 8-10. trinn ved Øyatun skule la opp til to framsyningar i Halsnøy Kulturhus måndag kveld, der dei serverte eit variert program for både foreldre, søsken, besteforeldre og andre. Rikke Sjo og Bjørg Ommer Bjelland var kveldens konferansierar.
Det heile starta med song av Mia Øvrevik Farestad og Mari Vaagen Hansen. Deretter gjekk det slag i slag, med både dans, sketsjar, og morosame filmsnuttar. Alt ispedd massevis av humor og ein stor dose ungdomleg sprell. Innimellom fekk den fullsette salen høyra litt meir seriøse musikalske innslag, med både song, fiolin, elgitar og band.
Annonse
Stolt og imponert
Det heile vart runda av med ein fellessong til stor applaus frå dei frammøtte. Lærar Mette Hvidevold var nøgd med gjennomføringa.
– Trass i at over tjue elevar var sjuke veka før, og at me heilt på tampen måtte ta vekk eit par innslag, vart det også i år ei vellukka juleavslutning. Det ligg mykje førebuing bak, men det er verkeleg verdt det. Det er fantastisk å sjå elevar som elles syt seg med å framføra på skulen, stå på scena og anten syngja eller spela instrument. Det kostar mykje for nokon, så me blir både stolte og imponerte, rosar Hvidevold.
Under kan du sjå bilete frå juleavslutninga.
Hannah Medhus og Lisa Ulrich Emmerhoff framførte ein flott dans.Marthe Eide
Eit morosamt innslag: «Kongen befaler», inspirert av TV-programmet på TVNorge fekk fram latterbrøl i salen. Åsmund Sætre, også kalla Sætrekongen, og Magnus Jordal var programleiarar, medan Peter Nesheim, Tomine Lygre, Ingeborg Isdal Hvidevold, Marthe Alvær, Veslemøy Stusvik og Ingrid Margrete Eik Arnevik måtte bryna seg på morosame oppgåver.Marthe Eide
Tomine Lygre stakk av med sigeren, men takka fint nei til premien som var ein skulptur av Sætrekongen Åsmund.Marthe Eide
Kveldens konferansierar var Rikke Sjo og Bjørg Ommer Bjelland.Marthe Eide
Dyktige niandeklassingar spelte på mange ulike instrument.Marthe Eide
Kommentatorboksen slo godt an i salen.Marthe Eide
Bård Øvsthus, som nyleg gjekk av med pensjon som lærar på Øyatun skule, var innleigd som dirigent for gutekoret, som bestod av elevar frå alle trinn. Eit kor som både sjarmerte og fekk opp stemninga i salen, med mellom anna songen «Drunken Sailor».Marthe Eide
Marthe Alvær (i midten) fortalte eventyret om Raudhette og ulven, noko som fekk dei frammøtte til å både le og bli raud i fjeset. Raudhette vart spelt av Ingrid Margrethe Arnevik Eik (t.v.) og Tomine Lygre (t.h) var ulven. Eit nokså «på kanten» innslag der raudhette var alt anna enn redd ulven.Marthe Eide
Lærarane Anne Synnøve Irgens Vassenden og Bjarte Eide måtte fram på scena og bryna seg på ein nokså grufull leik. Med bind for augene skulle lærarane lukta seg fram til produkt som kanel, makrell i tomat og eddik. Her hadde konferansierane Rikke Sjo og Bjørg Ommer Bjelland gjort eit godt førearbeid. Dei hadde nemleg plukka ut produkt som dei visste lærarane ikkje var særleg glad i.Marthe Eide
Under kvelden før kvelden-innslaget til Tilde Eide (t.v.), Mari Vageen Hansen og Mia Øvrevik Farestad sat latteren laust i salen. Ribba vart svidd, men svoren, den vart heldigvis sprø.Marthe Eide
Jentene serverte fleire gode humorinnslag, som til dømes songnummeret «Skål» frå Jul i svingen. Fort og gale skålte dei for alle lærarane på Øyatun skule.Marthe Eide
Milla Sjo Frøystad framførte songen «Vil Du Shalala» av Stavangerkameratane på vakkert vis. Med seg hadde ho eit storband, beståande av dyktige 9.klassingar. Musikklærar Aleksandra Sanden dirigerte medan ho slo på tamburin.Marthe Eide
Lisa Ulrich Emmerhoff imponerte på fiolin.Marthe Eide
Det heile vart runda av med ein fellessong til stor applaus frå dei frammøtte.Marthe Eide
