Mykje nytt i landbruket

Sjølv om det var isande kaldt og arrangementet måtte flyttast, samla markdagen i Omvikdalen mykje folk som fekk sjå spennande nytt på utstyrsfronten.

Markdagen måndag kveld var eit samarbeidsprosjekt mellom A-K maskiner, Eik senteret og Norsk landbruksrådgiving. Planen var å samlast på garden til Oddmund og Kjersti Hjelmeland, men grunna dårlege vêrmeldingar valde ein å flytta ned til parkeringsplassen ved Dalheim og skulen.

Der stilte A-K maskiner mannsterkt for å demonstrera siste nytt innan traktorar og utstyr.

– Vi viser fram diverse utstyr for jordbearbeiding, sjølv om det ikkje akkurat er vêr for det i dag. No blir det ei rein utstilling, og så får vi heller snakka litt om maskinane, sa Thor Birger Tollefsen, som til vanleg held til på Frakkagjerd i Førresfjorden.

 

GPS

Firmaet sin hovudattraksjon på samlinga var ein ny traktor med GPS-styring, av merket Case IH Luxxum.

– Meininga er at ein skal kunna køyra svært nøyaktig når ein køyrer att og fram, spesielt i samband med såing og gjødsling. Målet er at utstyret skal vera nøyaktig ned til pluss/minus 20 centimeter, men det viser seg at når signala er gode nok, kjem ein nesten ned i 0 cm i avvik, smiler Morten Smedsrud, produktsjef for Case IH hjå A-K maskiner på Kløfta.

 

Lyst å prøva

I ein svær New Holland-traktor sat den unge gjengen Thor Olav Hjelmeland, Jan Olav Hjelmeland og Jan Åge Sjo Kårstad.

– Eg har lyst å prøva og køyra han, sa ein ivrig Jan Olav.

– Han er ganske god. Eg har køyrt traktor før, men ikkje akkurat dette, opplyste Jan Åge.

Samson Feedt på si side nøydde seg med å sjå på alle maskinane.

– Eg er pensjonist no, så eg er ute av det, smilte han, og konstaterte at det er store doningar som er på marknaden for tida.