Musikk gjev glede
Deltakarane i Demenskor Kvinnherad opplevde ei god og rørande stund då dei hadde første øving i Valen kyrkje for eit par veker sidan. No ynskjer dei at fleire blir med.
Demenskor Kvinnherad har nyleg blitt oppretta, og ynskjer å gje eit tilbod til alle med demens eller kognitiv svikt. I Valen kyrkje møtest både kormedlemer og frivillige annankvar tysdag for å syngja saman.
– Musikk generelt er jo bra for alle, seier musikkterapeut Sølvi Marie Berge.
Annonse
Aktiverer hjernen
Berge instruerer og dirigerer koret saman med Gøril Skeie Sunde. Sølvi held fram med å fortelja om effekten song og musisering har på oss:
– Musikken treff nervebanar inne i hjernen vår som kan vekkja til live noko av det som ein dement har gløymt og mista. Det er sunt å syngja fordi det aktiverer så mange deler av hjernen samstundes.
Det kan verka som at dei merka ein god effekt av songen alt på første øving, om ein høyrer korleis Synnøve Solbakken opplevde det:
Annonse
– Det var heilt spesielt. Det var så fint å møtast, det var ei sånn ro og glede. Alle song som om me hadde gjort dette ilag mange gonger før. Det var ei rørande oppleving, fortel ho.
Solbakken er ei av pådrivarane for prosjektet. Ho vart kontakta av Solveig Dahl, som arbeider på Husnestunet. Dahl fortel:
– Me var tre personar på jobb som ville ha eit demenskor i Kvinnherad. Me visste at Synnøve var veldig engasjert, så me tok kontakt med ho, og ho har teke det vidare.
Alle er med og syng
Synnøve Solbakken er no styreleiar, og har med seg Solveig Dahl, Marianne Heggelund Simonsen og Monica Hovland Enæs i styret. Dei har samarbeida med både ordførar og kommunedirektør for å få dette til. I tillegg er det frivillige som hjelper til med det som trengs, støttar kormedlemene, og syter for kaffi.
– Me er alle med og syng, det er ikkje sånn at me står langs veggen og ventar. Me vil laga dette saman, og instruktørane er veldig flinke til å få alle med, slår Synnøve Solbakken fast.
Annonse
Etter øvinga er det ei kaffistund for alle, der drøsen går, og ein kan syngja litt meir, om nokon vil det.
Plass til fleire
– Det gler oss veldig når det kjem folk som vil sjå om dette er noko for dei. Anten du vil vera frivillig, eller du er blant dei som har kognitiv svikt eller er dement – alle er velkomne. Me øver her annankvar tysdag frå klokka 16:30.
Instruktørane vil gjerne at dette skal vera noko meir enn ei vanleg songstund.
– Ja, me vil at dette skal vera eit kor. Me vil øva litt skikkeleg på songane, få med alle tonane og teksten. Og få i gang pusten og ein god klang, seier Gøril Skeie Sunde.
Det er ikkje altfor vanskeleg å få god klang i Valen Kyrkje. Stemninga og akustikken her legg alt til rette for gode korøvingar framover, med samhald og songglede.
