Musikalske futurismerefleksjonar - Vaage er nominert til årets verk 2021

Knut Vaage er med «Hybrid Spetakkel» kåra til årets, eller rettare fjorårets, verk av Norsk Komponistforeining.

Den timelange konserten «Hybrid Spetakkel» vart urframført på Borealis i 2020. I følgje Komponistforeininga resulterte samansmeltinga av elektronikk, akustisk lyd, lys, laser og video i ein kreativ loop - eit ”Hybrid Spetakkel”.

Komponisten, som kjem frå Sunde, har sjølv forklart at ideen bak verket oppsto ut ifrå tanken om at dagens entusiasme for ny teknologi kan opplevast som ein ny type futurisme, og at uttrykket i verket inviterer til refleksjon omkring dette.

– Menneska i vår tid kan visa stor entusiasme for teknologiutviklinga, men kan også oppleva ein redsel for å bli overflødiggjort av teknologien. I «Hybrid Spetakkel» blir tilhøvet mellom menneske og teknologi belyst i eit musikalsk multimedialt landskap, seier Vaage sjølv om verket.

Dette kjem fram i artikkelen der Norsk Komponistforeining annonserte nominasjonen.

Musikk som kunstform

Det var i november det vart det kjend at Vaage var nominert med dette verket. Prisutdelinga skulle i utgangspunktet gå føre seg den 10. desember, men grunna covid vart hendinga utsett til 2022, likeeins offentleggjeringa av prisvinnarane. I tillegg til tre likeverdige prisar for Årets verk 2021, gir Komponistforeininga ut prisar for Årets utøvar og Likestillingsprisen. Dato for offentleggjering er enno ikkje sett.

Årets verk blir gitt til verk som fortener å bli løfta fram for sine særeigne kvalitetar, signert komponistar som jobbar med lyd og musikk som kunstform.

– I år fekk me inn 171 forslag, fordelt på 144 ulike verk urframført i 2018-2020. Vårt Musikkfaglege utval har nominert 20 verk blant desse, skriv foreininga om prisen.

Juryen som har kåra dei tre vinnarane i kategorien Årets verk, består av Rei Munataka, Maren Ørstavik, Antti Auvinen og Bjørn Morten Christophersen.