Musikalsk haust
Den komande konserten med Cantus Firmus og Glimrah på søndag, er berre den første i rekkja av eit rikhaldig program i Kvinnherad kyrkje. Det skjer nemleg noko om lag kvar helg fram mot jul.
Publisert
Sist oppdatert
– Ja, no er samfunnet opna opp, smiler soknerådsleiar Berta Haugland, og legg til at det likevel var tilfeldig at arrangementa kom så tett som helg etter helg. Med god variasjon i musikken, vil det truleg vera noko for ein kvar smak.
Den første helga i november skal Åsmund Kaldestad og Berit Opheim framføra sine «Kveldshymner». Her vil publikum få servert norske seinmellomalder-balladar attåt engelske songar frå 1500- og 1600-talet, ført i pennen av komponistane Herny Puchell, Thomas Champion og John Dowland.
Annonse
– På denne tida var det mykje sjukdom og død, og i denne konserten blir det mellom anna refleksjonar om døden. Dette temaet snakkar vi ikkje så mykje om, så eg trur det blir veldig fint, spår Haugland.
Ideen bak «Kveldshymner» er i følgje artistane å opne eit rom der publikum kan reflektere rundt eige liv og kring eigen død, eller rundt det å miste nokon ein har hatt kjær. Kva kan desse gamle tekstane og melodiane gi publikum i dag? spør dei seg.
Konserten er akustisk med elektroniske verkemiddel. Tore Nysæther er regissør for programmet, og han står også for scenografien.
Trøkk og hardangerjazz
Annonse
Dernest er det klart for konsert med Gospelkoret Abraham og Lina Håland.
– Dette blir ein konsert med god trøkk i! Gospelkoret Abraham har vore her før òg. Dei er mange, mellom 25-30 flinke songarar, og Lina Håland er jo ein veldig dyktig songar. Ho var jo tidlegare prest her, understrekar Haugland, i tilfelle den songglade, tidlegare Uskedalenpresten, Håland har gått nokon hus eller øyre forbi.
På programmet står det også jazz. Helga etter at tonane frå gospelmusikken har stilna kjem nemleg det Jondalbaserte Hardanger Big Band til Rosendal. Sidan oppstarten i 1987 har bandet hatt mange prosjekt og konsertar, samt samarbeidd med fleire dyktige musikarar. Hardanger Big Band kan skilte med fem saksofonar, tre trombonar, fem trompetar, bass, piano, slagverk og vokalist, oger musikalsk leia av Arild B. Nielsen.
Julekonsertar, tradisjon tru
Cantus Firmus har dessutan planar om fleire julekonsertar i år, og vitjar både Varaldsøy (27. nov.), Åkra (15. des.) og Rosendal (18. des.) med sine vakre og fleirstemte røyster. Solfrid Siqveland, som gler seg stort til å halde konsertar utan restriksjonar etter gamalt, lovar eit variert repertoar.
– Det blir solistar, duettar, kvintettar og, ja, kva heiter alle desse samansettingane no igjen? Me dekker dei siste 400 åra musikalsk, frå Bach til i dag, smiler ho.
Annonse
Vidare vert det understreka at mange i koret har store talent på andre instrument enn på vokal, og understreker at det vert stor variasjon i instrument, kor fleire av medlemene i Cantus Firmus skal få sin plass i sola.
– Vi menneske er skapt for å samlast, og eg trur det er mange som er glade for å endeleg kunne gå ut på ting.
– Ja, folk må koma seg ut. Her er det jo nesten blitt som i ein storby; det er noko som skjer kvar helg, legg Haugland til.
Det endelege kirsebæret på toppen er at jula endeleg kan spelast inn, tradisjon tru, av skulekorpset og musikklaget i Rosendal.
– Det blir jo nesten ikkje jul utan at dei speler, avsluttar Haugland.
