Museetande ugle forårsaka ulukke

I 00.48-tida måtte politiet rykka ut til ei trafikkulukke inne i Furebergtunellen der ein bil hadde blitt påkøyrd bakfrå etter å ha stogga i tunellen. Årsaka til stoggen var derimot av den dyriske sorten.

- Bilføraren av den fremste bilen såg ei ugle som sat midt inne i tunellen og prøvde forståeleg nok å bremsa for å unngå å treffa dyret. Så kjem det ein bil bak frå og smell inn i bilen. Det vart ikkje noko personsonskade, men mykje materielle skadar, fortel politistasjonssjef Sigurd Børve.

- Det blir oppretta sak på aktlaus køyring og dette med å vera merksam på det som føregår framfor seg, legg han til.

Personskadar vart kanskje det ikkje, men det inkluderer dessverre ikkje den stakkars ugla som mista livet i ulukka. Etter funn på åstaden konkluderte politiet med at årsaka til kvifor ugla valde å sitja inne i tunellen var for å eta ei nyfanga mus.