Motiverte til inkludering

300 personar møtte opp for å høyra på Petter Nyquist sine inspirerande ord då Nav inviterte til inkluderingsdugnad i Kulturhuset Husnes torsdag.

Under slagordet «Saman får vi fleire i arbeid» skipa Nav Sunnhordland til inkluderingsdugnad både på Husnes og Stord torsdag. Det med Petter Nyquist, kjent frå TV 2-programmet «Petter Uteligger», med på laget. Eit trekkplaster som førte til at 300 personar, i form av både arbeidssøkjarar, arbeidsgivarar og andre, møtte opp på arrangementet i kinosalen på Husnes torsdag morgon.

Sjå mennesket

Dagen byrja med at leiar for Nav Sunnhordland, Astrid Østerlid, ynskte velkommen, før vi via lerretet fekk helsa på eit knippe av Nav sine samarbeidspartnarar i Sunnhordland. Bedriftsleiarar i regionen, der i blant Bernt Bjørsvik frå Dimmelsvik Bil og Roger Skarveland frå BKS, som fortalte om sine erfaringar med rekruttering frå Nav.

Etter det endra Petter Nyquist scena. Han fortalte morosame, interessante og røyrande historier frå sitt eige liv. Alt frå skulegang, polarekspedisjonar og møtet med gata i Oslo.

– Etter mine 52 dagar på gata i Oslo, så lærte eg å leggja frå meg alle fordommane eg hadde frå før. Den varmen, omsorga og kjærleiken eg møtte frå menneska ute på gata gjorde noko med meg. Eg prøver no å sjå mennesket bak fasaden, sa Nyquist før han kom med ei klar oppmoding.

Lite som skal til

– Gå inn i deg sjølv, spør deg sjølv kva du kan gjera for andre. Vi har alle ein kompetanse som kan bidra til å skapa eit lyspunkt i kvardagen til folka vi har rundt oss. Det å vera eit medmenneske kostar ikkje noko som helst, og det er i tillegg utruleg enkelt. Samstundes så kan det bidra til å gjera ein stor forskjell. Det å visa at vi bryr oss, og at vi gjer det med ein ekteheit, er utruleg viktig i arbeidet med inkludering. Anten vi gjer det med vener og familie, kollegaen eller folk vi tilfeldigvis møter på gata, sa Nyquist.

Han oppmoda oss om å vera litt meir som barn, dei har nemleg ikkje lært seg å få fordommar enno.

– Det er så lett å dømma folk etter fyrsteinntrykket. Men kven er desse menneska? Vi må vera rause, opne og inkluderande, og samstundes sjå verdien i kvar og ein, slutta Nyquist.

Etter å ha brukt morgonen på Husnes, gjekk turen vidare til Stord for ein ny inkluderingsdugnad for 350 påmeldte.