Motiv frå Kvinnherad blant vinnarbileta i Sony World Photography Award 2022
Bondhusvatnet er godt marknadsført gjennom bilete på sosiale medium. Men no har vatnet, med den vesle robåten som speglar seg i det blanke, igjen auge frå heile verda på seg. Hans Kristian Strand har nemleg vore i Kvinnherad med kameraet sitt.
Publisert
Sist oppdatert
Hans Kristian Strand er ein norsk landskapsfotograf, som er busett i Porsgrunn. Fotografiet hans gjekk til topps då den nasjonale prisen for Norge skulle plukkast ut i den store fotokonkurransen.
The Daily Mail er blant blekkene som har skrive om konkurransen, og her er fotografiet av Bondhusvatnet presentert.
Annonse
«Hans Kristian Strand tok dette magiske biletet av Bondhusvatnet Isbreen i Kvinnherad, Norge. Ved å imponere juryen, landa Strand topplasseringa i den nasjonale prisen for Norge. Sjølv seier Strand: – Eg elskar denne fredfulle staden. Eg vitjar Bondhusvatnet kvar år, og håpar alltid å få det perfekte biletet. Denne gongen klarte eg det endeleg.»
Til Grenda stadfestar han dette.
Som å sjå inn i eit nasjonaromantisk måleri
– Det var vanvittig moro. Det var ein annan fotokompis som først fortalte meg at biletet var i The Daily Mail, eg vart kjempekry og måtte ringe rundt og fortelje det til folk, medgir han, framleis glad.
Annonse
Dette fotografiet vart tatt på hans fjerde besøk i Kvinnherad, men det er hovudsakleg Bondhusvatnet han har besøkt når han har vore her.
– Det er ein heilt utruleg fin plass. Når ein sit der er det akkurat som å sjå rett inn i eit nasjonalromantisk måleri. Eg har alltid likt bileta frå nasjonalromantikken, og det er noko liknande eg ynskjer å skapa med mine fotografi; at folk skal kunne drøyme seg bort i dei, seier han.
Strand fann gleda i fotografering i 2018, og omtalar seg som sjølvlært hobbyfotograf. Han er særleg aktiv på Instagram, kor ein kan finne fleire av bileta hans på denne brukaren: @hans.k_photography.
Stor internasjonal deltaking
Deltakarane frå konkurransen kjem frå 61 nasjonar. Totalt har 340.000 fotografi blitt sendt inn til konkurransen, kor 170.000 av desse har delteke i den opne klassen. Det er blant desse 170.000 at dei nasjonale vinnarane blir valt, slik som motivet frå Kvinnherad.
The Daily Mail har valt ut eit knippe av fotografia som gjekk til topps i programmet for The National Awards, som såleis får litt ekstra merksemd.
Annonse
«Skroll ned for å sjå vårt utval frå årets vinnande bunke, frå eit forbløffande bilete av Le Mont Saint-Michel ved solnedgong, til eit uforgløymeleg bilde av ein utanomjordisk lavaområde i Island….» skriv avisa, og lokkar lesarane sine inn i ei internasjonal biletferd – som også svingar innom Kvinnherad.
Her kan ein sjå alle fotografia som har vunne nasjonal pris i årets konkurranse.
