Møter Lyn i historisk opprykkskamp
Synne Eide Bjørnebøle og Åsane heldt unna i siste seriekamp mot Øvrevoll Hosle. Med det er oransjetrøyene eit steg nærmare Toppserien.
Publisert
Sist oppdatert
Halsnøy-jenta Synne Eide Bjørnebøle slo corneren som førte til Åsane si fyrste scoring i skjebnekampen heime mot Øvrevoll Hosle søndag.
Åsane måtte ha poeng for å sikra seg 2. plassen i 1. divisjon, og med det ein plass i kvalifiseringa til sjølvaste Toppserien.
Annonse
Synne og Åsane leia 1-0 til pause og dobla leiinga like etter sidebyte. Etter det handla det mest om gjestane frå Bærum.
Øvrevoll Hosle reduserte etter timen, og jaga inn utlikninga då det stod att eit kvarter på Åsane Arena. Men sjølv om dei sette inn eit valdsamt køyr i jakta på sigersmålet det siste kvarteret, heldt Åsane unna. Og etter 2-2 i siste seriekamp, sikra oransjetrøyene 2. plass i 1. divisjon og klubbens beste tabellplassering nokosinne.
No er dei to kampar unna opprykk til Toppserien. Det einaste som står mellom dei og opprykk, er Toppserie-laget Lyn. Etter fire strake tap på tampen av sesongen enda Lyn på den sure 9. plassen på tabellen, og må difor forsvara sin plass i den øvste divisjonen.
Den fyrste kvalifiseringskampen går av stabelen på Kringsjå kunstgras i Oslo allereie onsdag ettermiddag. Før det heile skal avgjerast på Åsane Arena søndag ettermiddag.
