Møt Asbjørnsen og Moe på Pink Floyd-scena
Tradisjonen tru slår gjengen bak Pink Floyd-prosjektet til med eit skikkeleg barne- og familiearrangement også denne gongen.
Arrangementet er eit samarbeid mellom Gaa Paa og Kulturhuset Husnes, og er noko som har blitt arrangert ved kvart Pink Floyd-prosjekt.
– Me tykkjer det er veldig stas å inkludera barn og barnefamiliar også denne store kulturhelga. Det er borna som skal fylla kulturhusa også i framtida. Arrangementet plar vera svært populært, men kinosalen på Husnes er stor, så me har plass til alle borna som vil, seier eldsjel i Pink Floyd-prosjektet Oddbjørn Kloster i ei pressemelding.
Annonse
Trollet og Bukkane Bruse
Laurdag 10. februar er det altså Askeladden Friteater som syt for underhaldinga i kinosalen med førestillinga «Eg fant, eg fant!». Dette skriv dei om førestillinga:
«I førestillinga møter to forfattarar, nærare bestemt Asbjørnsen og Moe, publikum, og etter noko klabb og babb er dei i gang med å fortelja eit eventyr om Askeladden. Askeladden er ute på tur og gjer det han gjer best, nemleg å finna ting. På sin tur møter han på både kjerringa med nasa i stubben, sjølvaste prinsessa, fela til Veslefrikk, og jammen dukkar det ikkje opp eit digert troll også. Trollet har dessverre ikkje skremt nokon på lenge, men Askeladden veit råd, og vips, så er Bukkane Bruse innom på besøk».
