Møsevatn og Midtbotnvatn renn over: – Liten risiko for rasjonering

SKL er ute med ei ny oppdatering på fyllingsgraden i magasina deira. Her stadfestar dei at tilsiget til Sunnhordland kraftlag sine vassmagasin går heilt som normalt på denne tida av året.

– Faktisk er det sånn at Møsevatn og Midtbotnvatn, som høyrer til Blåfalli-anlegga våre i Kvinnherad og Etne kommunar, er fulle, og til og med renn litt over akkurat no. Dette skjer sjølv om det også i år har vore normal høg produksjon gjennom sommaren. Fleire har sikkert vore til fjells og sett dei tomme magasina i sommar, men det er altså naudsynt for å få plass til mest mogleg av vatnet som kjem no, forklarer Liv Kjersti Skartland, leiar for krafthandel i SKL, i ei pressemelding.

At vatn går i overløp er ikkje ønskjeleg, då det som kunne blitt omgjort til straum heller renn over kanten. Samstundes er dette noko som pleier å skje på denne tida av året, då Folgefonna gir frå seg store mengder vatn.

– Når vatnet renn over i Møsevatn og Midtbotnvatn, så renn det ned og blir fanga opp i Blådalsvatnet. Og frå Blådalsvatnet får me produsert straum av alt vatnet, forklarer Skartland.

Jamt tilsig frå Folgefonna

Det er Folgefonna som er hovudårsak til at det er ulik fyllingsgrad i SKL sine magasin og dei andre vassmagasina i prisområdet (NO2).

I følgje NVE sin vassmagasinstatistikk for veke 33, kan ein sjå at fyllingsgraden for norske magasin låg på 68,9 %, medan fyllingsgraden for prisområde NO2 låg på 50,2 %.

Skartland peikar i dette høve på at vassdrag er ulike og at ein av særtrekka ved SKL sine magasin er at det årleg kjem eit godt tilsig frå Folgefonna, og at magasina såleis, som regel, blir fylt sjølv gjennom tørre somrar.

– Våre fulle magasin bidreg til å sikre kraftforsyninga i regionen gjennom vinteren. Sjølv om det åleine dessverre ikkje er nok til å få tilbake normale kraftprisar med det fyste, gjer det at regionen har kraft. Det er styresmaktene som tar avgjerdene om eventuell rasjonering, men vår vurdering er at det er svært låg risiko for at det blir rasjonering, avsluttar Skartland.