Morten Vevatne er ny rektor ved KVV

1. oktober byrjar Morten Vevatne (42) som rektor ved KVV. Han har ingen grandiose planar, men går inn i stillinga med det som står fram som ei særs fruktbar haldning:

– For meg blir det viktig å vera audmjuk og gjera meg kjent med drifta og folka på skulen. Det handlar jo ikkje om kva eg vil, men om kva elevane og dei tilsette på skulen vil, og om kva me kan få til i lag.

Vevatne har sine røter frå Sunde, og bur i dag på Husnes. Dei siste seks åra har han pendla til Odda, kor han har vore tilsett som oppvekstsjef i Ullensvang kommune. Som følgje av kommune-samanslåinga vart Vevatne sitjande med leiingsansvaret for 30 einingar innan oppvekst og utdanning i den nye storkommunen.

Lært mykje

Det er fleire ting frå denne tida han ser fram til å kunne nyttegjera seg av, når han til hausten trer inn i stillinga som rektor ved KVV.

– Åra i Odda har vore innhaldsrike og kjekke, og eg har udelt positive erfaringar frå denne tida. Eg har vore del av ei veldig spanande leiargruppe med rådmannen på topp, og saman med dei 30 einingsleiarane eg har samarbeidd med har dette vore ein flott gjeng, som det blir vemodig å ta farvel med, medgir Vevatne før han held fram.

– Eg har lært utruleg mykje og vore med på å setja i gong fleire prosjekt innan oppvekst og utdanning, og mellom anna jobba ein del inn mot politikken. Slike erfaringar trur eg kan koma godt med i stillinga ved KVV, samt i søknadar og andre prosessar mot Vestland fylkeskommune.

Har sakna ungdommane

Men den erfaringa han hausta som rektor ved Husnes ungdomsskule, før han byrja som oppvekstsjef i Odda, blir likevel trekt fram som hovudgrunnen til at han søkte på stillinga ved KVV.

– Før eg byrja i Odda var eg rektor ved Husnes ungdomsskule i seks år. Det var kjekke elevar og lærarar, kommunen var ein god arbeidsgjevar og eg treivst veldig godt i rektorrolla. Eg søkte meg der i frå for å utvida horisonten og fagfeltet mitt, men eg har sakna å jobba i eit kollegium, med ungdommar, samt det å sjå direkte resultat av satsingar på ulike område, seier han.

Dette saknet har han kjent på fleire gonger i løpet av dei seks åra i nabokommunen, og då rektorstillinga ved KVV vart utlyst, var det ein moglegheit han ikkje ville gi slepp på.

– KVV verkar å vera ein god og framtidsretta skule med engasjerte tilsette, understrekar Vevatne og legg til at han ser fram til å bli kjend med både folk og drift.

Den nye basiskunnskapen

– Du tek formelt over etter Audun Bjelland, som skal vera rektor for Nettskulen i Vestland, ei satsing som kanskje seier noko om kor den vidaregåande skulen er på veg hen. Har du tankar om dette?

– Pandemien har hatt ein positiv bi-effekt for digitaliseringa og tekniske løysingar, det har vore ein stressfaktor som har ført til at både lærarar og elevar har blitt veldig gode på feltet. Ein ser òg at digitalisering er blitt ein av basiskunnskapane, saman med lesing, skriving og rekning, og dette med virtuelle klasserom er med på å gje gode moglegheiter for valfridom, samstundes som ein såleis kan utvide tilbodet til elevane, byrjar Vevatne, før han kommenterer det sjølvsagte; at han er ein mann av mange ord, og held fram.

Nettskulen i Vestland: Skal sikre lik tilgang til kompetanse

Ein sosial og relevant arena

– Men eg trur det er viktig å halda ein 2-beins strategi, der ein på eine sida sikrar drifta og på den andre sida er med på utviklinga. Dei fysisk etablerte skulane må gi ferske og gode undervisningstilbod, og det er kjempeviktig å ivareta elevane sine behov for sosial kontakt.

Den komande rektoren ønskjer òg at tilbodet ved skulen skal opplevast som relevant, både for elevar og for lokalsamfunnet, og ser fram til å samarbeida med elevar, tilsette og det lokale næringslivet for å leggja til rette for dette.

Før desse oppgåvene tek til skal han sjå til at barnehagar og skular i Ullensvang kommune får ein trygg og god start.