Mørklagte kyrkjer i adventstida – lovar flaumlys på juledagane

Tidlegare har mange av kyrkjene i Kvinnherad vore opplyste i adventstida. I år sparer kyrkja fotona til juledagane.

Mørklagte Kvinnherad-kyrkjer i adventstida har fått ein og annan til å reagera. Kyrkjeverje Torstein Aarthun i Kvinnherad kyrkjelege fellesråd fortel at det blir slik fram til jul.

– Me som kyrkje har også eit ansvar i den situasjonen ein er i, altså at kraft er ein knapp ressurs, og då må me følgja etter, seier kyrkjeverjen.

Lys på juledagane

– Tidlegare har me hatt ein tradisjon for flaumlys på kyrkjene i adventstidene. Sokneråda har kjøpt inn lys, og me i fellesrådet har betalt for straumen. I fjor vart mykje skifta til LED-lys, så straumforbruket er ikkje heilt enormt med det. Men det ville ta seg dårleg ut å skru på lys i denne tida, og me syns det ville vera eit dårleg signal at me lyser opp bygningar når kommunen sløkkjer lys og skrur ned temperaturen i sine bygg, utdjupar Aarthun.

Han påpeikar at alle arrangementa deira inne i kyrkjene går som vanleg, med lys og varme til alle.

– Juledagane blir kyrkjene lyste opp utanfor også, ikkje berre inne. Me som kyrkje vil vera med og ta eit tak på straumbruk, slik alle andre må gjera. Me må sjå den store samanhengen, sluttar Aarthun.