Mønstra på sommarskulen og vekes-tokt med «Galeas Gurine»

Frå måndag til fredag skal 4.-10. klassingar frå sommarskulen vera med på ei vekes-tur med «Galeas Gurine». Det er mannskapet på seglskuta Gurine som er kursleiarar, og turen går ut i den flotte skjærgarden.

Undervegs på turen vil ungdommane få praktisk opplæring i ei rekkje dugleikar som trengs for å trygt handtera eit stort skip. Ungdommane vil få erfaring med til dømes å sette segl, navigere, tryggleik på sjøen, tauarbeid og å bruke ulike knop og stikk. Dei vil samstundes få opplæring i vanlege arbeidsoppgåver om bord, skriv Kvinnherad kommune. På ei slik vekes-tokt ligg det godt til rette for at ungdommen får fordjupa seg i segling, utvikla ny kunnskap og nye vennskap.

– Eg har aldri vore med på noko slikt før. Eg gler meg veldig til å få segla med skuta, fortel Peter Nesheim. Han er ein av dei som skal få prøva seg som mannskap. På sida av han står bror hans, Karsten Nesheim, lika spent og forventningsfull.

– Eg er veldig spent. Dette er min aller fyrste gong på sommarskule, fortel Karsten.

– Eg gler meg mest til å bada, skyt Kevin inn, som har eit ynskje om å få hoppa frå skuta.

– Òg eg ser fram i mot å læra mykje om seglskuta, seier Gaute.

Tryggleik fyrst

Kursleiar, Bjarne Øymyr, kan fortelja at dei legg seglturen opp etter vindretninga.

– Det er meldt mykje vind på kysten, difor set me snuten mot fjorden fyrst. Uansett retning blir dette kjekt for alle, seier Øymyr.

Knut E. Skåla (87), også kjent som «Monsaknuten», er blant dei vaksne som skal vera med på vekes-tokta i lag med ungdommane. Han har vore med i dugnadsgjengen heilt sidan «Galeas Gurine» blei brakt heim til Rosendal.

– Eg likar godt å segla, så dette blir kjekt. Eg er jo trass alt ein gamal gutunge enda, seiar Skåla med eit smil.

Han legg også til at skuta er stor, og at det er svært viktig med sikkerheit om bord.

– Me tar difor sikkerheita til elevane på høgst alvor, slår Skåla fast.