Mogeleg ny rekord for Kjeldestøl Venelag langfredag

Tradisjonen tru stilte Kjeldestøl Venelag sine budeier til støls med både rømmegraut og mjølkekaker også denne påsken.

I forkant rekna dei med 200-250 som realistisk, då spesielt med tanke på vêret. Noko overraskande kom det altså omkring dobbelt så mange, som igjen vart merka på salet av maten.

– Det som er synd er at me for andre året på rad vart utseld for mjølkekaker og rømmegraut lenge før tida. Me må berre beklaga til dei som ikkje fekk. Til neste år må me rett og slett ta høgde for at svært mange vil til Kjeldestøl langfredag, og prøva å laga nok mat, konkluderer leiaren for venelaget Morten Nygård.

Nygård fortel at det var ti budeier i sving denne langfredagen, og at dei, som alltid, gjorde ein fantastisk innsats.

– Sjølv om det er gjort veldig mykje bra arbeid på å restaurera sela, så er det jo budeiene som på mange vis er blitt våre frontfigurar. Det at me har slike arrangement høgt til fjells, som i tillegg trekk så mange folk, må nesten vera unikt i landet. Ein skal i alle fall leita lenge etter noko liknande, seier Nygård.

Nygård takkar også Kvinnherad Røde Kors Hjelpekorps som kom opp for å henta ned ein person som hadde vore uheldig og skada seg.

– Det er godt å ha lokale krefter når redningshelikopteret har for mange andre oppdrag å prioritera. Me takkar samstundes alle som tok seg av vedkomande i ventetida, understrekar Nygård.

Avslutningsvis minner Nygård om at budeiene kjem attende til sommaren.