Møbeldesignar frå Rosendal representert i «Neste generasjon»-utstilling

Utstillinga opna i dag, onsdag 23. mars, og står til 28. mars. Her er eit knippe av landets nye og etablerte designarar innan møbel, gullsmed og tekstil valt ut til å presentere sine konsept. Møbeldesignaren frå Rosendal er ein av desse.

Hausten 2020 vart designarar og designstudentar invitert til å sende inn sine bidrag til Lagvis, under temaet «Neste generasjon». Møbelet trong ikkje vera ferdig utvikla, men det skulle vera mogleg for ein møbelsnekkerelev eller lærling å byggja dette i løpet av 4 veker. Møbelet skulle bli laga i kortreist heiltre, som furu, bjørk, ask eller eik.

Ein fagjury gjekk gjennom dei innsendte designa og valte ti arbeid som skulle gå vidare til produksjon av prototype. Møbel-konsepta som vart utvald til Lagvis 2021/2022 er designa av Nebil Zaman, Jomi Evers, Hanna Tørstad, Edvin Klasson, Kim Thome, Sigurd Røsok, Taran Johanne Neckelmann, Tobias Berg, Vilde Hagelund, i tillegg til Njål Hatteberg.

Prototypane desse ti designarane sendte inn har dernest blitt laga av handverkselevar og lærlingar, og det er desse som no er utstilt. Stolen til Hatteberg er produsert av fire elevar frå Hjerleid husflidskule på Dovre.

– Dei er framtidas møbelsnekkarar, slår Njål Thunold Hatteberg fast.

Neste generasjon

– Utgangspunktet mitt var at stolen skulle vera mogleg å stable, for slik å spare plass. Med tematikken «neste generasjon» har eg tenkt på neste generasjons huskjøparar, og med høge bustadprisar ville eg laga ein stol som kunne passa til mindre rom. Dette var grunntanken, fortel Hatteberg i telefon frå Oslo.

Han har også hatt neste generasjon i tankane i samband med materialbruk.

– Kjøkenstolen «Plank» er komponert på ein måte som er materialbesparande, og det blir såleis mindre svinn. Dette er også utgangspunktet for namnet på stolen, då det er planken, eller treemnet, som har lagt føringar for designet, forklarar han.

Det er to versjonar av Plank som er utstilt, ein som er behandla med linolje med grønt fargepigment og ein naturleg. Begge er laga av ask.

Njål møbeldesignar

Mogleggjer gode konsept med samarbeid

Ideen bak Lagvis er å etablere ein arena som fagmiljøa kan lære av, samstundes som dei gjensidig utfordrar einannan. Lagvis-utstillinga skal vise kva som er mogleg når fagpersonar jobbar saman.

Lagvis vart først gjennomført i 2019/2020, og har som mål å vise kva som bur i dagens og framtidas handverkarar og designarar - ikkje å produsere feilfrie prototypar. Resultatet av samarbeidet kulminerer i den årlege Lagvis-utstillinga i Oslo.

Kurator for Lagvis er Kirsten Visdal, som er ein av landets fremste interiørstylistar.

Skave; skjære, skrape, spikke (av) med skarpt reiskap