Ministertung Kvinnheradkonferanse

– Det blir eitt rått program i år. Me får med olje- og energiminister Terje Aarsland på første dag av konferansen, og klima- og miljøminister Espen Barth Eide på den andre dagen, seier ein sprekkeferdig stolt næringslos Frode Hetlevik når han presenterer kva som ventar i Kvinnheradkonferansen for 2023.

– Tilbakemeldinga er at det er ingenting liknande på Vestlandet denne hausten. Eg håper og trur me treff heilt på programmet, smiler Hetlevik.

Tett program

Næringslosen har blinka inn framtidas energikjelder som er tema for konferansen 27. og 28. september, med alt det som ligg innanfor det.

– Eg har tatt dette temaet fordi me må våga å ta dei tøffe diskusjonane og snakka om korleis me kan ha nok energi i framtida her på Vestlandet, og kva skal me satsa på i Kvinnherad. Me har satsa mest på vasskraft i Kvinnherad, og det kan me utvikla vidare, men det er mykje anna me også kan satsa på. Difor er det om kjernekraft, bølgjekraft og solenergi, i tillegg til bioenergi, vindkraft og vasskraft, eksemplifiserer Hetlevik.

Første dagen er det funne plass heile 16 innlegg, i tillegg til tre innslag frå The Voice-kjende Endre Olsen frå Stord. Dag to er ferdig til lunsj, men det er likevel pressa inn åtte føredrag og paneldebatt.

– Heile programmet er førebels litt levande, og det kan bli litt endringar på dag 2, seier næringslosen om det stramme programmet.

Innimellom dei mange føredraga kjem Sparebanken Vest for å kåra årets bedrift og årets grünerbedrift i Kvinnherad.

I foajeen blir det messe parallelt med konferansen inne i kinosalen.

– Det blir jobba med stands, og fleire utstillarar er klare, fortel Hetlevik.

Førarsetet

Næringslosen vurderer kraftsituasjonen som avgjerande for kva retning ein tar framover.

– Me må setja oss i førarsetet for dei energikjeldene me skal ta med oss inn i framtida. Me må sjå på korleis me skal utvikla oss, og våga å ta opp dei store temaa og diskusjonane. Me i Kvinnherad har store mogelegheiter som leverandør til havvindindustrien, nemner Hetlevik som eitt døme.

Heile programmet er å finna på nettsida til Kvinnheradkonferansen.no