Mini-nobelkonsert i Nyasago

Christophe Melius-Darnley Brede har sidan mai arbeidd med eit prosjekt til støtte for barna på barneheimen Mahala i Chernivtsi i Ukraina. Før krigen hadde Mahala ein kapasitet på maks 10 barn, og det var allereie fullt. Då krigen starta vart 47 barn flytta frå Mariupol til denne barneheimen i Mahala, og dei er no 57 barn som bur her, dei aller fleste med alvorlege fysiske og psykiske handikap. Korkje toalett, bad eller andre rom var laga for så mange barn, og dessuten ikkje lagt til rette for barn med handikap.

Dei gløymde borna i Ukraina: – Sette vekk for å døy. Bortgøymd og bortgløymd.

Gjennom arbeidet sitt har Christophe no, med støtte frå mellom anna Malteserordenen, fått oppgradert baderomma til betre standard og gjort kvardagen lettare for pleiarane. I tillegg har dei fått til eit filtreringssystem, slik at barna får reint vatn.

– Det er framleis ein lang veg å gå, men vi er i det minste i gang, seier Christophe.

Nobelkonsert

Vivi-Ann og Christophe har den seinaste tida jobba med å sette saman denne konserten, og med seg på laget fekk dei fleire lokale musikarar som gav publikumarane eit fantastisk show. Med seg hadde dei også Volodymyr Kaverin, ein ukrainsk artist som no bur på Husnes.

Ivar Baste var konfransier og leia konserten med både alvor og humor.

– I dag delte nobelkomiteen ut pris, kor det ukrainske Center for Civil Liberties var ein av vinnarane. Så på sett og vis er dette ein mini-nobelkonsert. Det at det også er Putins 70-årsdag i dag, får vi heller la forbigå i stillheit, sa han til latter frå salen.

Volodymyr Kaverin spelte fleire av sine songar, og fekk besøk på scena av Vivi-Ann Brede for ein sang på både fransk og ukrainsk. Torbjørn Storegjerde styrte lyden, men fann òg tid til å setja seg ved pianoet og synga ei låt. Christian Meaas Svendsen serverte flotte tonar på kontrabassen, og Ingebjørg Eik framførte ein sjelefull versjon av Nick Cave sin «Into my arms» akkompagnert av Bjarne Øymyr på piano. Maria Hass Solheim avslutta konserten med ein nydelig framføring av John Lennons «Imagine».

Christophe har oppretta ein Spleis for barna ved Mahala, og på konserten fredag kunne ein støtte med så mykje eller lite ein ville. Pengane vil gå til helsehjelp for barna over vinteren, noko dei står i fare for å mista.

– Eg vil takka alle som kom i kveld og alle som har vore med å støtta spleisen. Dette vil ikkje berre kome barneheimen Mahala til gode, men det gir òg eit sterkt signal til andre om at det trengs hjelp, og det støtter utforminga av betre nasjonale systemer for barneheimer i heile Ukraina, sa Christophe.