Milliardresultat for Alsaker-konsernet
Alsaker-konsernet, som er konsernselskapet til Alsaker Fjordbruk, fekk eit resultat før skatt på 1,22 milliardar kroner i 2022.
Publisert
Sist oppdatert
Det opplyser konsernet sjølv i ei pressemelding fredag. Omsetnaden i 2022 på kr 2969 millionar kroner, noko som gir dette ein resultatmargin på svært solide 41,2 prosent.
Konsernet er i realiteten eigd av Gerhard Alsaker aleine, med hovudkontor på Onarheim på Tysnes. Aktiviteten i Kvinnherad er likevel stor, med slakteriet på Sunde og stor aktivitet på blant anna Borgundøy.
Annonse
37.000 tonn laks
– Alsaker er eit vertikalintegrert oppdrettskonsern med produksjon av laks. Konsernet dreiv i 2022 fire smoltanlegg, 24 matfiskkonsesjonar, slakteri, reinsefiskanlegg og eit havbrukssenter. Konsernet har også eigen brønnbåt og ein stor flåte av servicebåtar, skriv konsernet om seg sjølv.
– I 2022 produserte konsernet i overkant av 37.000 tonn laks, litt meir enn året før. Slaktevolumet auka også litt samanlikna med året før, opplyser konsernet.
Driftsinntektene auka frå 2031 millionar kroner i 2021 til 2969 i fjor. Resultatet før skatt var 517 millionar kroner i 2021, mot 1223 millionar i 2022. Ettersom Gerhard Alsaker i praksis eig konsernet aleine, styrkar dette overskotet hans posisjon som ein av dei rikaste vestlendingane. I 2021 var det berre Trond Mohn og Iwan Knutsen (som blant anna eig Rosendal Fjordhotel) som hadde høgare formue enn Alsaker sine 1,64 milliardar kroner.
Annonse
Produksjon i 14 kommunar
Ved utgangen av 2022 var det 271 fast tilsette i Alsaker-konsernet.
– Konsernet har godt kvalifiserte og motiverte personar i alle ledd i organisasjonen. Dyktige medarbeidarar er ein viktig suksess-faktor for Alsaker-konsernet, rosar konsernsjefen.
I tillegg til i Kvinnherad og Tysnes, skjer produksjonen i konsernet i 12 andre kommunar: Alver (Meland), Bjørnafjorden (Fusa), Bømlo, Etne, Kvam, Sveio, Haugesund (Røvær), Stavanger (Rennesøy), Sandnes, Suldal, Tysvær og Vindafjord.
