Milliardar i straumstøtte til «vanlege folk»
Laurdag føremiddag la regjeringa fram ei mellombels ordning som skal hjelpe vanlege folk i heile landet med å handtere dei rekordhøge straumprisane gjennom vinteren.
Publisert
Ordninga går ut på at staten betaler halvparten av øvste del av straumrekninga, når den gjennomsnittlege prisen per kilowattime går over 70 øre (eks. mva.). Regjeringa anslår at dei vil bruke om lag 5 milliardar kroner (inkl. mva.) på dette.
– Vi har vore opptatt av å treffe breitt, når vi brukar så mykje pengar er det viktig at alle får glede av det. No håpar vi det skal vere litt lettare å gå inn i julehøgtida for mange, uansett om du bur i eit trekkfullt hus, ein leilegheit eller på ein gard, sa finansminister Trygve Slagsvold Vedum.
Annonse
Det første trekket er planlagt i januar, altså når straumrekninga for desember skal bli betalt.
Lette på ekstraordinært høge prisar
Ordninga fungerer slik at hushaldningane får fråtrekk på rekninga når straumprisane er ekstraordinært høge. Delen staten skal betale blir trekt direkte frå rekninga frå nettselskapet eller straumleverandøren.
Marte Mjøs Persen la fram nokre døme der kraftprisen i reknestykket var på 120 øre per kilowattime (eks. mva.), noko som også er presisert i pressemeldinga frå konferansen:
Annonse
– For ein hushaldning i ein einebustad som nyttar 3280 kilowattimar i desember, kan ordninga bety ei støtte på 1025 kroner for denne månaden. For ei hushaldning som bur i ei leilegheit og nyttar 1336 kilowattimar i desember, kan det bety ei støtte på 418 kroner. Kva støtta faktisk blir avhenger av kor mykje straum hushaldninga brukar, og korleis kraftprisen utviklar seg i det området ein bur.
Hushaldningane vil få støtte til eit straumforbruk opp til 5000 kilowattimar av forbruket per månad. Ordninga gjeld frå og med desember, til og med mars 2022.
Spørsmål og svar for kompensasjonsordninga, samt andre prisdøme, kan ein finne på Reguleringsmyndigheten for energi i NVE (RME) sine sider.
Likevel vanskeleg å forhalde seg til rekninga
Gunnhild Sæbø er glad for at regjeringa har kome med eit tiltak, men meiner beløpet er for lågt og at det heller ikkje treff så godt for dei som treng det aller mest.
– Det er ikkje forbrukarane sin feil at prisen har galoppert i det siste, så eg meiner faktisk at regjeringa burde ha tatt ein mykje større del av rekninga, til dømes frå 50 øre, seier ho.
Annonse
Ho er glad på vegne av alle som får bustønad og sosialhjelp allereie i desember, men peikar på at mange berre har litt for mykje i månaden til å kunne nytte seg av ordningar som desse.
– Det er mange i det nedre løns-sjiktet, som berre tener nokre hundrelappar for mykje til å få bustønad. Sjølv med denne hjelpa frå staten vil straumrekninga deira bli vanskeleg å forhalda seg til.
