Miljøpris til Eide Fjordbruk
– Det er ingen tvil: Skal vi lukkast med omstillinga i næringa, så må det satsast på lukka teknologi i sjø, slår Sondre Eide fast.
Publisert
Vestland Venstre delar årleg ut ein miljøpris på Verdas miljødag, 5. juni. I år gjekk den til Eide Fjordbruk. Prisen vart delt ut av stortingsrepresentant for Hordaland og nestleiar i Venstre, Sveinung Rotevatn.
– Havbruksnæringa skapar store verdiar, men skal vidare vekst vera mogleg må ein løysa miljøutfordringane rundt lus og rømming. Eide fjordbruk tar dette på alvor, og har vist både stor risikovilje og miljøengasjement gjennom sitt arbeid med lukka merdar, seier Rotevatn i ei pressemelding.
Annonse
Med på utdelinga var også Jens Håkon Birkeland, nestleiar i Vestland Venstre.
– Det er kjekt å kunne dela ut miljøprisen til nokon som står i bresjen for å utvikla ny teknologi som bidreg til at vi kan nå klimamåla våre. Venstre heiar på dei som tørr å satsa sjølve, og særleg dei som satsar for grøn omstilling, kommenterer han.
Lukka teknologi
Sjølv om Michelin-stjerna nok heng høgare, tykte dagleg leiar i Eide Fjordbruk, Sondre Eide, det var stas å få miljøprisen til Vestland Venstre.
Annonse
– Eg er så stolt over den gjengen som arbeider hos oss, frå merdkanten til teiknebrettet. Ingenting av det vi har oppnådd til no hadde vore mogleg utan folka i Eide. Denne prisen vil gje oss ei vitamininnsprøyting til å jobba vidare. For det er ingen tvil: Skal vi lukkast med omstillinga i næringa, så må det satsast på lukka teknologi i sjø, slik at vi kan konvertera alle lokalitetane våre, seier Eide
